Chim-giân 5 - 現代台語譯本漢字版

禁戒淫亂

¹ 我的子啊，著留心我的智慧， 俯耳孔聽我明理的話，

² 互你通慎重計劃， 互你的言語顯出智識。

³ 因為淫婦的嘴唇甜粅粅， 伊的嘴滑溜溜；

⁴ 毋拘後來變做苦嗏嗏， 親像雙面利的劍會傷害人。

⁵ 伊的腳行向死地； 伊的腳步行落陰府。

⁶ 活命平坦的路，伊無想欲行； 行入彎曲危險的路，伊嘛毋知。

⁷ 我的子兒啊，著聽趁我； 毋通棄拺我所講的話。

⁸ 著離開淫婦的路遠遠， 毋通近倚伊的門口，

⁹ 才免你將家己的精力互別人， 將你的歲壽交互殘忍無情的人；

¹⁰ 才免生份人提你的錢財去享樂； 你拍拼得著的財富攏變做別人的。

¹¹ 到尾你的身軀衰敗， 你就悲哀吐氣，講：

¹² 「害啊，我哪會厭惡管教， 藐視責備；

¹³ 閣無聽導師的話， 無聽趁教示我的人。

¹⁴ 我佇會眾的大會中， 受著責罰，見笑甲欲死。」

¹⁵ 著飲家己水池的水， 飲家己井內出的水。

¹⁶ 你的泉水豈通滿到外面？ 你的溪水豈通流去市場口？

¹⁷ 伊只有屬你一人； 毋通及別人公家。

¹⁸ 著互你的水泉受祝福； 著對你少年的時所娶的某得著歡喜快樂。

¹⁹ 伊親像可愛的鹿母，媠的山羊母； 你佇伊的胸前不時得著滿足； 伊的愛情互你時常戀慕。

²⁰ 我的子啊，你是按怎戀慕淫婦？ 是按怎攬別人的某？

²¹ 因為人所行的路上主攏看會著； 人一切的行做伊攏啲監察。

²² 歹人會互家己的罪過擒牢牢， 會互家己罪惡的索縛死死。

²³ 伊會因為無受管教致到死亡， 會因為過頭愚戇行迷路。