Chim-giân 4 - 現代台語譯本漢字版

智慧的好處

¹ 我的子兒啊，著聽老父的教示； 著專心學習才會明白。

² 因為我用好的道理互恁； 毋通放拺我的教導。

³ 我嘛曾做阮老父的細子， 是阮老母上疼的孤子。

⁴ 老父有教示我，講： 「你著記牢我的話， 遵守我的命令就會得著性命。

⁵ 著尋求智慧，尋求聰明； 毋通𣍐記得，毋通放拺我所講的話。

⁶ 毋通棄拺智慧，伊會保護你； 著意愛智慧，伊會照顧你。

⁷ 智慧上重要，著拍拼尋； 著付出你一切所有的來對換聰明。

⁸ 你尊重智慧，伊會高舉你； 你疼惜伊，伊會互你尊榮。

⁹ 智慧會用花冠戴佇你的頭殼， 將榮光的王冠賜互你。」

¹⁰ 我的子啊，著聽，著領受我的話， 你就會長歲壽。

¹¹ 我有指示你智慧的路， 引導你行正直的道路。

¹² 你行的時，𣍐抵著阻礙； 你走，嘛𣍐觸著跋倒。

¹³ 著持守教示，毋通放鬆； 著謹慎顧守，因為智慧是你的性命。

¹⁴ 歹人的路毋通行； 邪惡的人的路毋通入。

¹⁵ 著閃避，毋通對遐過； 著越走，向前行。

¹⁶ 歹人若無害人𣍐睏得， 若無互人跋倒睏𣍐落眠。

¹⁷ 因為𪜶用邪惡做飯食， 用強暴做酒飲。

¹⁸ 義人的路親像透早的光， 愈照愈光，照到中晝。

¹⁹ 歹人的路親像暝時烏烏暗暗， 人觸著跋倒嘛毋知是按怎。

²⁰ 我的子啊，著注意聽我的教示， 俯耳孔聽我講的話。

²¹ 著不時注意，毋通忽略； 著記牢佇心內。

²² 尋著的人得著性命， 歸身軀攏勇健。

²³ 著盡力保守你的心， 因為心是性命的根源。

²⁴ 你的嘴毋通欺騙； 你的嘴唇毋通歪曲是非。

²⁵ 你的目睭著看直直； 著注目看頭前。

²⁶ 你行的路著修互平； 你的道路就攏平坦好行。

²⁷ 毋通偏左偏右； 著互你的腳離開邪惡。