Chim-giân 31 - 現代台語譯本漢字版

對王的勉勵

¹ 利慕伊勒王的老母教示伊的話：

² 「我的子，我親生的子， 我下願得著的子啊，我著給你講什麼？

³ 毋通佇婦仁人身上用盡你的精力； 毀壞君王的路毋通行。

⁴ 利慕伊勒啊，作王的毋通飲酒，千萬毋通； 王親好厚酒嘛毋應該，

⁵ 才免飲落去煞𣍐記得法令， 忽略困苦人的權益。

⁶ 厚酒著互啲欲死的人， 薄酒互心艱苦的人；

⁷ 互伊飲了𣍐記得家己的散赤， 𣍐記得伊的艱苦。

⁸ 著為著𣍐講話的人發言， 為著所有無依倚的人申冤。

⁹ 著開嘴照公義判斷， 為著困苦散赤的人申冤。」

才德的婦仁人

¹⁰ 有才德的婦仁人啥人尋會著？ 伊的價值大大超過珠寶。

¹¹ 伊的丈夫信賴伊， 什麼攏無欠缺。

¹² 伊一世人互丈夫有利益無損害。

¹³ 伊尋羊毛及幼麻， 甘心親手做工。

¹⁴ 伊親像商船， 對真遠的所在運米糧來。

¹⁵ 天未光，伊就起來， 準備食物互家內的人， 將應該做的工課分派互女婢。

¹⁶ 伊尋著合意的土地就買起來， 用伊的手所賺的栽種葡萄園。

¹⁷ 伊穿衫撇紮，準備好勢， 手骨儼硬通出力工作。

¹⁸ 伊知所經營的順利有利益； 伊的燈歸暝點光光。

¹⁹ 伊的手提籰仔； 伊的手心按紡車。

²⁰ 伊慷慨賑濟困苦人， 伸手幫贊散赤人。

²¹ 伊免為著落雪為家內的人煩惱， 因為全家攏有厚衫通穿。

²² 伊為家己做媠的毯仔； 伊所穿的就是幼麻布及紫色布做的衫。

²³ 伊的丈夫佇城門口人人攏識， 因為伊及本地的長老做夥坐。

²⁴ 伊做幼麻布的衫去賣， 閣賣腰帶互生理人。

²⁵ 伊用氣力及威儀做衫穿； 伊想著將來的景況就笑微微。

²⁶ 伊開嘴講智慧的話； 伊的舌有仁慈的教示。

²⁷ 伊𠢕料理家內的事， 無食閒飯。

²⁸ 伊的子兒睏醒起來就給伊祝福； 伊的丈夫嘛稱讚伊，講：

²⁹ 「婦仁人好德行的真多， 毋拘你上好。」

³⁰ 外表好看是虛假，媠嘛是空空， 毋拘敬畏上主的婦仁人會得著謳咾。

³¹ 伊的手所做的成果著給伊肯定； 伊所做的應該佇公眾面前得著稱讚。