Chim-giân 30 - 現代台語譯本漢字版

¹ 下面是雅基的子亞古珥教示的話，伊對以鐵及烏甲按呢講：

² 「我是眾人中上愚戇的， 連一般人的智識都無。

³ 我無學著智慧， 嘛無至聖的上帝的智識。

⁴ 啥人曾上天閣落來？ 啥人曾用手搙著風？ 啥人曾用衫包水？ 啥人曾界定地的極頭？ 伊的名叫什麼，伊子的名叫什麼，你知無？

⁵ 上帝的話逐句攏經過鍛鍊； 所有倚靠伊的人，伊做𪜶的盾牌。

⁶ 伊的話，你毋通加添， 才免受責備，判做講白賊。

⁷ 「我對你求兩項代誌； 佇我死以前毋通無互我。

⁸ 求你互虛假及白賊離開我遠遠； 求你互我無散赤嘛無好額， 賜我需要的米糧，

⁹ 才免我飽足毋認你，講上主是啥人； 才免我散赤煞偷提， 致到褻瀆我的上帝的名。

¹⁰ 「毋通對主人講伊奴僕的歹話， 才免伊給你咒詛，你煞受責罰。

¹¹ 「有一寡人咒詛𪜶的老父， 嘛無給老母祝福。

¹² 有一寡人看家己做清氣， 毋拘無洗除家己的污穢。

¹³ 有一寡人目頭高， 目神驕傲。

¹⁴ 有一寡人的牙親像劍，齒親像刀， 欲吞食地上的困苦人及世間的散赤人。

¹⁵ 「蜈蜞有兩個查某子不時喝講：『互我，互我。』 𣍐知足的有三項， 連𣍐講『夠額啦』有四項：

¹⁶ 陰府、𣍐懷孕的胎、 較多水嘛無夠的地，及𣍐講『夠額』的火。

¹⁷ 恥笑老父， 藐視，毋聽趁老母， 此款人的目睭會互山谷中的烏鴉啄去， 會互鷹鳥的子食去。

¹⁸ 「我想𣍐出的奇妙有三項， 連我毋識的有四項：

¹⁹ 鷹鳥佇空中的路， 蛇佇石磐頂的路， 船佇海中的路， 男女交合的路。

²⁰ 淫婦的路嘛了解： 伊食了就拭嘴， 講『我無做歹』。

²¹ 「互大地搖動的有三項， 連擔當𣍐起的有四項：

²² 奴僕做王， 戇人脹到飽，

²³ 無人緣的女子出嫁， 女婢取代女主人。

²⁴ 「地上有四項微細的動物， 毋拘極有智識：

²⁵ 蚼蟻雖然弱小， 毋拘會曉佇熱天準備食物；

²⁶ 石貛雖然無勇壯， 毋拘會曉佇石縫作巢；

²⁷ 草蜢雖然無王， 毋拘會曉組隊出去；

²⁸ 蟮蟲仔雖然人用手掠會著， 毋拘𫢶佇王宮。

²⁹ 「行路威風的有三項， 連腳步威風的有四項：

³⁰ 獅，野獸中第一猛的， 抵著什麼都𣍐閃避；

³¹ 獵狗、山羊， 以及有軍兵保護的君王。

³² 「你若自高自大憨憨仔做，抑是計謀歹代， 著用手掩嘴。

³³ 絞牛奶會出奶油， 拍著鼻會流血； 親像按呢，大受氣會起相爭。」