Chim-giân 3 - 現代台語譯本漢字版

對少年人的勸告

¹ 我的子啊，毋通𣍐記得我的教示； 你的心著持守我的命令；

² 按呢，你會長歲壽好過日， 享受平安繁榮。

³ 毋通互慈愛及真實離開你； 著縛佇你的頷頸， 刻牢佇你的心內。

⁴ 按呢佇上帝及人的面前， 你會得著恩典及好名聲。

⁵ 著專心倚靠上主； 毋通倚靠家己的聰明。

⁶ 佇你一切的所做攏著尊重伊， 伊會指點你的路。

⁷ 毋通看家己做有智慧； 著敬畏上主，離開歹事。

⁸ 按呢，你的身體會勇健， 你的筋骨會勇壯。

⁹ 著用你的財物 及一切頭水的土產獻互上主。

¹⁰ 你的粟倉就會滿滿， 酒窟有新酒滿出來。

¹¹ 我的子啊，毋通看輕上主的管教， 嘛毋通厭惡伊的責備。

¹² 因為上主責備伊所疼的人， 親像老父責備伊所意愛的子。

¹³ 得著智慧的人真有福氣， 伊有得著聰明。

¹⁴ 得著智慧比得著銀較有利益， 比對金得著的利純較高。

¹⁵ 智慧比紅寶石較貴氣； 人所意愛的無一項會當及伊比。

¹⁶ 伊的正手有長歲壽； 伊的倒手有好額及尊貴。

¹⁷ 伊的路有喜樂； 伊的道路互人平安繁榮。

¹⁸ 持守智慧的人對伊得著性命； 堅守的人攏真有福氣。

¹⁹ 上主用智慧建立地， 用聰明安置天。

²⁰ 伊用智識互深淵裂開， 互穹蒼滴露水。

²¹ 我的子啊，著持守真的智慧，慎重計劃； 著不時注意，毋通忽略；

²² 按呢才會互你得著性命， 成做你頷頸媠的妝飾。

²³ 你就會安穩行你的路； 你的腳𣍐觸著跋倒。

²⁴ 你倒啲，一定𣍐驚， 倒落去，會真好睏。

²⁵ 忽然發生通驚的代誌，你毋免驚； 歹人欲給你毀滅，你嘛毋免驚。

²⁶ 因為上主會做你的倚靠； 伊會保守你的腳無陷落羅網。

²⁷ 你若有氣力做好，毋通拒絕； 著幫贊需要幫贊的人。

²⁸ 你若做會到，毋通對你的厝邊講： 「你轉去，明仔載閣來，我才互你。」

²⁹ 厝邊及你和睦徛起， 你毋通設計害伊。

³⁰ 人毋曾陷害你， 你毋通無緣無故及伊冤家。

³¹ 毋通欣羨強暴的人， 嘛毋通揀伊所行的路。

³² 歪曲是非的人上主厭惡； 正直的人上主及伊親密。

³³ 上主咒詛歹人的家； 義人的厝受伊祝福。

³⁴ 藐視人的，上主藐視伊； 謙卑的人，上主施恩互伊。

³⁵ 智慧的人會得著尊榮； 愚戇的人所得著的是見笑。