Chim-giân 29 - 現代台語譯本漢字版

¹ 人受責罰猶毋肯悔改， 會忽然失敗滅亡，𣍐赴給救。

² 義人執政，人民歡喜； 歹人掌權，人民吐氣。

³ 意愛智慧，父母歡喜； 結交妓女，傾家蕩產。

⁴ 王施行公義，國就穩固； 強收賄賂，國就滅亡。

⁵ 扶挺厝邊， 是啲設羅網纏家己的腳。

⁶ 歹人會互家己的罪纏著； 毋拘義人有歡呼有快樂。

⁷ 義人關心散赤人的案情； 歹人攏無關心。

⁸ 自高自大的人給城製造混亂， 毋拘有智慧的人會互受氣煞。

⁹ 智慧的人及戇人相告， 戇人只有受氣抑是恥笑，攏𣍐解決。

¹⁰ 愛刣人的怨恨純全的人， 毋拘正直的人保護伊的性命。

¹¹ 戇人有受氣就攏摒出， 毋拘有智慧的人會曉控制受氣。

¹² 統治者若欲聽白賊話， 官員攏會變做歹。

¹³ 散赤人及壓迫者有共同的所在： 上主攏互𪜶的目睭金，會看見。

¹⁴ 王若照公正判斷困苦人， 伊的王位會永遠堅固。

¹⁵ 管教及責督會加添智慧； 無管教的囝仔會互老母見笑。

¹⁶ 歹人掌權，罪過就加添； 義人會看著𪜶失敗。

¹⁷ 管教你的子，伊會互你安心， 閣會互你的心歡喜。

¹⁸ 無上帝的指示，人民就放縱， 毋拘遵守律法的人真有福氣！

¹⁹ 干焦用話，奴僕𣍐受管教； 伊明白嘛𣍐聽趁。

²⁰ 你曾看著隨便講話的人無？ 連戇人都比伊較有向望。

²¹ 奴僕若對細漢就給伊倖， 此個奴僕到尾會搶奪主人的財產。

²² 歹性地的人會惹起冤家； 𠢕發受氣的人會犯真多罪過。

²³ 人驕傲會互家己見笑； 心謙卑會互家己得著尊榮。

²⁴ 及賊分偷來的物是無愛家己的性命； 伊雖然咒誓作證嘛𣍐講實話。

²⁵ 驚人無驚上帝是給家己設羅網， 毋拘信靠上主就有安穩。

²⁶ 真多人愛對統治者求情， 毋拘只有對上主才會得著公正的判決。

²⁷ 無公道的人，義人厭惡； 行為正直的人，歹人厭惡。