Chim-giân 28 - 現代台語譯本漢字版

¹ 歹人無人追趇嘛啲逃走； 好人親像獅攏𣍐驚。

² 國家動亂，統治者就捷捷換； 有明理及智識的領袖，國家就久長安定。

³ 散赤人欺壓困苦人， 親像落大雨給五穀沖掉。

⁴ 棄拺律法的謳咾歹人， 毋拘遵守律法的反對歹人。

⁵ 邪惡的人無明白公義； 尋求上主的人完全明白。

⁶ 行為正直的散赤人 較贏做代誌彎曲的好額人。

⁷ 謹慎守律法的，是智慧的子； 及貪食的作伴，互父母見笑。

⁸ 人靠放重利發財， 是啲給憐憫散赤人的積聚財富。

⁹ 耳孔越走毋聽律法的人， 伊的祈禱上帝厭惡。

¹⁰ 迷惑正直人行歹路， 會跋落去家己挖的陷坑， 毋拘純全的人會承接好的產業。

¹¹ 好額人看家己做有智慧， 毋拘伊有幾兩重，聰明的散赤人看甲真清楚。

¹² 義人勝利，人人慶祝； 歹人得志，人人閃匿。

¹³ 遮蓋家己的罪過，一定𣍐亨通； 認罪悔改，一定得著憐憫。

¹⁴ 不時敬畏上帝的人真有福氣！ 硬心的人會抵著災禍。

¹⁵ 抵親像噤噤哮的獅及尋食的熊， 邪惡的統治者嘛按呢啲管轄散赤的人民。

¹⁶ 無知的統治者施行暴政； 厭惡不義之財的人會長歲壽。

¹⁷ 刣死人的著互伊一生做逃犯， 毋通救伊。

¹⁸ 做代誌正直的人會安全； 做代誌彎曲的人會忽然跋倒失敗。

¹⁹ 種作的人有夠額的米糧； 追求空空無價值的事會致到散赤。

²⁰ 有信用的人會得著真多福氣； 欲發橫財的人一定受刑罰。

²¹ 看人大細目，毋著， 毋拘人會為著一塊仔餅犯法。

²² 凍霜的人想欲緊發財， 無想講散赤啲聽候伊。

²³ 給人責備，到尾比給人扶挺 較會得著人歡喜接納。

²⁴ 偷提父母的物，閣講「這無算有罪」， 此款人及強盜像類。

²⁵ 貪心會引起相爭； 倚靠上主會得著豐盛。

²⁶ 想講家己是聰明的是戇人； 照智慧做代誌的人會安全。

²⁷ 賑濟散赤人𣍐致到欠缺； 假無看見會受真多咒詛。

²⁸ 歹人得志，人人走去匿； 𪜶若滅亡，義人就加添真多。