Chim-giân 27 - 現代台語譯本漢字版

¹ 毋通為著明仔載欲做的事誇口， 因為明仔載會發生什麼代誌你毋知。

² 著互別人謳咾，毋通家己褒； 著互外人稱讚你，毋通家己誇口。

³ 石頭重，沙嘛重； 戇人惹起的禍端比此兩項閣較嚴重。

⁴ 受氣猶會當當， 大受氣擔當， 怨妒，啥人擋會牢？

⁵ 當面的責備， 贏過無表明的疼。

⁶ 朋友造成的傷是出佇好意； 對敵的唚嘴是虛假。

⁷ 人食飽，連蜜都討厭； 腹肚枵，連苦的物都好食。

⁸ 人離開本所在去流浪， 親像鳥仔離開巢四界飛。

⁹ 芳油及香料互人的心歡喜； 朋友真誠的勸勉互心得著鼓勵。

¹⁰ 你的朋友及老父的朋友攏毋通放拺； 抵著患難的日毋通去兄弟的家； 近的厝邊贏過遠的兄弟。

¹¹ 我的子啊，著有智慧，互我的心歡喜， 互我通反駁恥笑我的人。

¹² 會變竅的人看著危險就閃避； 戇直的人進前去，受災害。

¹³ 給生份人擔保，著提家己的衫去做抵押； 替外人保證著家己承擔後果。

¹⁴ 透早給朋友吵醒， 祝福嘛變做咒詛。

¹⁵ 吵鬧的某親像落雨天㴙㴙滴；

¹⁶ 欲給伊擋，親像啲擋風擋𣍐牢， 親像手搙油搙𣍐牢。

¹⁷ 朋友互相激勵， 親像鐵磨鐵，愈磨愈利。

¹⁸ 管理無花果樹的，通食伊的果子； 照顧主人的，會得著尊榮。

¹⁹ 人對水照出家己的面； 人對心看出家己的真像。

²⁰ 陰府及滅亡攏填𣍐滿； 人的慾望嘛永遠𣍐滿足。

²¹ 煉銀用鼎，煉金用爐； 人對稱讚受考驗。

²² 戇人按怎教都教𣍐巧。

²³ 著詳細知你羊群的狀況， 留心照顧你的牛群；

²⁴ 因為錢財𣍐永遠留啲， 王位嘛𣍐續到萬代。

²⁵ 草割起來，新芛茁出來， 山頂的牧草嘛收起來，

²⁶ 綿羊的毛就通剪起來做衫， 山羊通賣來買田園，

²⁷ 山羊母的奶互你及家內的人夠額通食， 閣通養飼女婢。