Chim-giân 26 - 現代台語譯本漢字版

¹ 親像熱天落雪，收割的時落雨， 戇人得著尊榮，無合宜。

² 親像雀鳥仔飛起飛落，燕仔飛來飛去， 無理無由的咒詛𣍐發生作用。

³ 對馬著用鞭，對驢著用咬韁； 戇人的尻脊著用籐條。

⁴ 毋通照戇人的戇話應伊， 才免你及伊仝款。

⁵ 著照戇人的戇話應伊， 才免伊看家己做有智識。

⁶ 託戇人傳達消息， 親像斬斷家己的腳，傷害家己。

⁷ 箴言佇戇人的嘴， 親像瘸去的腳無作用。

⁸ 將尊榮互戇人， 親像用寶石做石頭囥佇挕索挕。

⁹ 戇人的嘴講箴言， 親像醉漢攑有刺的樹枝亂捽。

¹⁰ 倩戇人抑是醉漢做代誌， 親像箭亂射傷著人。

¹¹ 戇人一再做愚戇的事， 親像狗越轉來食家己吐出來的物。

¹² 你曾看著想講家己是聰明的人無？ 連戇人都比伊較有向望。

¹³ 貧憚的人講：「路裡有獅， 街路裡有猛獅。」

¹⁴ 貧憚人佇眠床翱來翱去， 親像門開來開去。

¹⁵ 貧憚的人手伸到盤裡， 提到嘴嘛嫌費氣。

¹⁶ 貧憚人看家己真巧， 贏過七個𠢕應答的人。

¹⁷ 過路人去插及伊無關係的糾紛， 親像人去扭狗仔的耳仔。

^18-19 人欺騙厝邊，講： 「我是啲滾笑」， 是親像𤞚人㧒火把、 利箭，及武器互人死。

²⁰ 火無柴就化去； 無人學話，相爭就煞去。

²¹ 愛相爭的人煽動紛爭， 親像炭上加炭，火上添柴。

²² 耳孔邊的閒仔話親像好食物，一下入嘴就吞落腹。

²³ 嘴甜，心奸惡， 親像瓷器漆粗銀。

²⁴ 假好的人講好聽話， 心內卻存詭詐。

²⁵ 伊講好聽話，你毋通信， 因為伊心內有七項通厭惡。

²⁶ 伊雖然用詭詐掩蓋家己的怨恨， 伊的邪惡會露現佇公眾面前。

²⁷ 掘陷阱的人，家己會跋落彼內面； 翱石頭的人，石頭會翱倒轉來硩著家己。

²⁸ 白賊的舌會傷害人； 扶挺的嘴會毀滅人。