Chim-giân 25 - 現代台語譯本漢字版

¹ 下面嘛是所羅門的箴言，是猶大王希西家宮廷的人抄寫的。

² 人尊崇上帝，因為伊將代誌蓋密； 人尊敬君王，因為伊將代誌查明。

³ 親像天赫呢高，地赫呢深， 王的心，人得了解。

⁴ 銀的渣滓先除去， 銀匠才會當做出媠的器具；

⁵ 王身邊的歹人先除去， 王位才會當用公義做基礎建立。

⁶ 毋通佇王的面前自高自大， 嘛毋通佔大位。

⁷ 寧可等人請你坐大位， 毋通佇有地位的人面前互人叫你落去。

⁸ 毋通匆碰欲及人相告， 才免到尾受厝邊凌辱的時毋知欲按怎做。

⁹ 你及厝邊有糾紛， 毋通漏洩別人的祕密，

¹⁰ 才免聽見的人責備你， 你的臭名得洗清。

¹¹ 講話合宜， 親像金蘋果鑲佇銀盤。

¹² 智慧的人的責備，對歡喜聽受的人 親像金的耳鉤及純金的袚鍊。

¹³ 可靠的使者互差伊的主人精神輕鬆， 親像熱天收割的時有霜雪的涼冷。

¹⁴ 無送禮物，干焦誇口禮物偌好， 親像有風有雲，無落雨。

¹⁵ 久長忍耐，權力者嘛會受感動； 溫柔的嘴舌會摃斷骨頭。

¹⁶ 你若尋著蜜，食夠額就好， 才免食過頭煞吐出來。

¹⁷ 毋通捷捷去尋厝邊， 才免伊起煩煞厭惡你。

¹⁸ 作偽證陷害厝邊的人， 親像槌、刀，及利箭會傷害人。

¹⁹ 患難的時信賴靠不住的人， 親像嘴齒斷去，腳脫輪。

²⁰ 對傷心的人唱歌， 親像冬天給伊褪外衫， 親像鹽撒佇孔嘴。

²¹ 你的對敵若枵，著互伊食， 嘴焦，著互伊飲；

²² 因為你按呢做，若準將啲𤏸的火炭疊佇伊的頭殼頂，互伊面紅知通見笑； 上主嘛會報賞你。

²³ 北風透就落雨； 誹謗的舌會惹人變面。

²⁴ 寧可𫢶厝頂的角頭， 嘛毋及吵鬧的婦仁人做夥住大間厝。

²⁵ 聽著好消息對遠遠來， 親像厭倦嘴焦的人飲著涼水。

²⁶ 義人佇歹人的面前屈服， 親像拍垃墋的井，踐濁去的水泉。

²⁷ 蜜食傷多毋好； 人過頭求家己的榮光嘛毋好。

²⁸ 𣍐曉控制家己的人， 親像無牆的城真緊受攻破。