Chim-giân 24 - 現代台語譯本漢字版

19

¹ 毋通欣羨歹人，嘛毋通愛及𪜶做堆，

² 因為𪜶的心計劃強暴的代誌，𪜶的嘴談論害人的事。

20

³ 厝靠智慧起造，用聰明建立；

⁴ 有智識的人的房間充滿逐項寶貝及貴重的財物。

21

⁵ 有智慧的人有大能力；有智識的人加添氣力。

⁶ 欲交戰著有好的策略；參謀多就會得勝。

22

⁷ 智慧高深，戇人𣍐了解；佇公共集會中伊無話通講。

23

⁸ 計謀做歹的人會互人叫做陰謀家。

⁹ 戇人的計謀攏是罪惡；藐視人的，人人厭惡。

24

¹⁰ 佇患難的日失膽，氣力就減少。

25

¹¹ 人受拖到死地，著給伊解救；人啲欲受刣，毋通無救伊。

¹² 你若講「此個代誌我毋知」，監察人的心的上帝豈𣍐審判？保全你性命的豈會毋知？伊豈𣍐照逐人的所做報應？

26

¹³ 我的子啊，著食蜜，因為蜜是好；食蜜房滴落來的蜜就知甜。

¹⁴ 著知，智慧佇你的心嘛是按呢；你若尋著，前途就光明，向望𣍐無去。

27

¹⁵ 毋通親像歹人埋伏欲攻擊義人的家；毋通破壞伊住的厝。

¹⁶ 義人跋倒七遍嘛會閣起來；歹人一下抵著災難就倒落去。

28

¹⁷ 你的對敵跋倒，毋通歡喜；伊倒落去，你的心嘛毋通快樂，

¹⁸ 才免上主看見無歡喜，煞互伊的受氣無臨到你的對敵。

29

¹⁹ 毋通因為做歹的人心內不平，嘛毋通欣羨歹人，

²⁰ 因為歹人無好結局，𪜶的燈會熄去。

30

²¹ 我的子啊，著敬畏上主及君王，毋通及反叛的人勾結，

²² 因為毀滅會對上主及君王忽然臨到恁，𪜶欲降落的災難啥人會知？

閣一寡智慧的話

²³ 下面所記嘛是智慧的人的話： 審判的時毋通有偏心。

²⁴ 給有罪的人判無罪，會受眾人咒詛，人人厭惡。

²⁵ 給歹人判有罪，會得著眾人歡喜；伊會大大受祝福。

²⁶ 用公正的話應答，表示真誠的友誼。

²⁷ 外面的代誌準備好勢， 田園好好種作， 才來起厝，成家立業。

²⁸ 毋通用無根據的見證陷害厝邊； 毋通作偽證欺騙人。

²⁹ 毋通講：「伊按怎對待我，我嘛欲按呢對待伊； 我欲照彼個人的所做給伊報復。」

³⁰ 我經過貧憚人的田園， 無智識的人的葡萄園，

³¹ 看見莿發甲滿滿是， 草刺遮蓋地面， 石牆嘛倒落去。

³² 我看見就深深想， 看了得著教示。

³³ 閣睏一久仔，閣眠一時仔， 閣撐一下仔，

³⁴ 散赤就親像賊來， 欠缺親像強盜到。