Chim-giân 23 - 現代台語譯本漢字版

6

¹ 你若及官長坐桌，著注意佇你面前的是什麼人。

² 你胃口若好，著會曉家己約束。

³ 毋通貪物件好食，因為彼是啲諞人的食物。

7

⁴ 毋通拖磨求好額，著有智慧家己約束。

⁵ 你目一下𥍉，錢財就無去，因為伊會發翼，親像鷹鳥飛上天。

8

⁶ 毋通食凍霜的人的飯，嘛毋通貪伊的好食物。

⁷ 伊真𠢕算，𣍐互你白白食。伊雖然對你講「請食，請飲」，其實伊心內無啲按呢想。

⁸ 你所食彼點仔嘛著吐出來；你所講的好話攏無路用。

9

⁹ 毋通講話互戇人聽，伊會看輕你智慧的話。

10

¹⁰ 毋通移徙早前所立的地界，嘛毋通侵佔孤兒的田園。

¹¹ 因為𪜶的贖回者上主大有能力，伊會替𪜶申冤。

11

¹² 著專心領受教示，俯耳孔聽智識的話。

12

¹³ 囝仔毋通無管教；用箠仔拍，𣍐致到死。

¹⁴ 你用箠仔拍，會救伊免落陰府。

13

¹⁵ 我的子啊，你的心若有智慧，我的心會真歡喜。

¹⁶ 你的嘴若講正直，我的心會真快樂。

14

¹⁷ 毋通欣羨歹人，著不時敬畏上主，

¹⁸ 將來一定有向望，你的向望𣍐無去。

15

¹⁹ 我的子啊，著聽，著有智慧，互你的心向正直的路。

²⁰ 好酒的、貪食的，毋通及𪜶往來做陣，

²¹ 因為好酒貪食，會致到散赤；歸日啲睏，會致到穿破衫。

16

²² 著聽趁生你的老父；你的老母老的時嘛毋通給伊看輕。

²³ 著買真理，毋通賣；嘛著買智慧、教示，及明理。

²⁴ 正直人的老父會大快樂；人生著智慧的子會因為伊大歡喜。

²⁵ 著互你的父母歡喜，互生你的老母快樂。

17

²⁶ 我的子啊，著將你的心交託我，目睭著注意看我的道路。

²⁷ 因為娼妓是深坑，淫婦是陷阱。

²⁸ 伊親像賊啲當等，欲互無忠實的人增加。

18

²⁹ 啥人啲喝「慘啊」？啥人啲喝「害啊」？啥人啲冤家？啥人啲怨嘆？啥人無緣故受傷？啥人目睭啲起煙暈？

³⁰ 就是飲酒毋知煞，四界尋調和的酒飲彼款人。

^31-32 酒佇杯內變紅閃熠，你毋通看；飲的時滑喉，到尾親像互蛇咬著，互毒蛇啄著。

³³ 你的目睭會看著奇怪的景象；你的心會錯亂，嘴講酒話。

³⁴ 你會親像倒佇海中，睏佇船柱頂。

³⁵ 你會講：「人拍我，我𣍐疼；人摃我，我毋知疼；我醒起來就閣去尋酒飲。」