Chim-giân 22 - 現代台語譯本漢字版

¹ 名聲比大財富較通意愛； 恩惠比金銀較通欣羨。

² 好額人及散赤人有共同的所在， 𪜶攏是上主所創造。

³ 會變竅的人看著危險就閃避； 戇直的人直直進前去，受災害。

⁴ 謙卑敬畏上主， 就有財富、尊榮、性命。

⁵ 𠢕歪曲是非的人行的路有莿及羅網； 保惜家己性命的人離開彼條路真遠。

⁶ 教導囝仔行合宜的路， 伊到老攏𣍐歪斜。

⁷ 好額人管轄散赤人； 欠債的做債主的奴才。

⁸ 撒不義種籽的人會收災禍； 伊欺壓人的勢力會受毀滅。

⁹ 好心的人有福氣， 因為伊將米糧分互散赤人。

¹⁰ 趕出自高自大的人，相爭就無去， 冤家及侮辱嘛會煞。

¹¹ 心清氣，講話溫和的人， 王會做𪜶的朋友。

¹² 上主的目睭看顧聰明的人， 毋拘伊破壞奸詐的人的言論。

¹³ 貧憚人講：「外口有獅， 我若出去會互伊咬死。」

¹⁴ 淫婦的嘴是深坑； 上主所厭惡的人會跋落彼內面。

¹⁵ 囝仔的心互愚戇纏啲， 管教的箠仔會給愚戇趕走。

¹⁶ 靠剝削散赤人來好額， 抑是送禮物互好額人， 攏會致到欠缺。

三十句智慧的話

¹⁷ 著俯耳孔聽智慧的人的話，專心領受我的教示；

¹⁸ 上好是囥佇你的心底，不時通應用。

¹⁹ 我今仔日按呢指示你，是欲互你倚靠上主。

²⁰ 此三十句教導及智識的話，我已經有寫互你，

²¹ 互你知諸個真理的話確實會靠得，通正確回答差派你的人。

1

²² 毋通因為人散赤給𪜶剝削；嘛毋通佇城門口欺壓困苦人，

²³ 因為上主會替𪜶申冤；搶奪𪜶的，上主會搶奪許個人的性命。

2

²⁴ 快受氣的人，毋通及𪜶交陪；歹性地的人，毋通及𪜶往來；

²⁵ 驚了你學𪜶的行為，家己煞陷落羅網。

3

²⁶ 毋通給人做擔保，毋通給欠錢的人保證。

²⁷ 你若𣍐當還，人會給你啲睏的眠床夯去。

4

²⁸ 早前你的祖公所立的地界，毋通移徙。

5

²⁹ 你曾看著𠢕辦代誌的人無？伊𣍐服事普通人，會服事君王。