Chim-giân 21 - 現代台語譯本漢字版

¹ 王的心佇上主的手中， 親像水流照上帝所定的方向啲流。

² 人看家己的所做做著， 毋拘上主審查人的動機。

³ 秉公行義 比獻祭閣較會得著上主接納。

⁴ 目頭高，心驕傲， 是歹人啲顯耀家己，攏是罪。

⁵ 人斟酌計劃會富足； 匆碰做代誌一定致到欠缺。

⁶ 人用詭詐得著的財利， 親像浮雲真緊就消失。

⁷ 歹人的強暴會害死家己， 因為𪜶毋肯實行公義。

⁸ 罪人的路彎曲； 純潔的人行為正直。

⁹ 寧可𫢶厝頂的角頭， 嘛毋及吵鬧的婦仁人做夥住大間厝。

¹⁰ 歹人的心意愛邪惡， 厝邊得𣍐著伊的關愛。

¹¹ 自高自大的人受刑罰，戇直的人會得著智慧； 智慧的人受教示，𪜶會得著智識。

¹² 公義的上帝監察歹人的家， 給歹人捙倒到滅亡。

¹³ 塞密耳孔毋聽散赤人哀求的， 伊將來求叫嘛無人欲插伊。

¹⁴ 暗中送禮會煞受氣； 祕密賄賂會煞大受氣。

¹⁵ 秉公行義互好人歡喜， 卻互歹人驚惶。

¹⁶ 偏離明理的路的人， 會及陰魂做夥住。

¹⁷ 愛奢侈的會散赤； 愛宴樂的𣍐好額。

¹⁸ 歹人會做義人贖回的價錢； 奸詐的人會做正直人的替身。

¹⁹ 寧可𫢶曠野， 嘛毋及吵鬧歹性地的婦仁人做夥住。

²⁰ 智慧的人厝內積聚貴氣的物； 戇人真緊就損了了。

²¹ 追尋公義及仁慈， 會尋著性命、繁榮，及尊榮。

²² 智慧的人𬦰上勇士的城， 拆毀𪜶所倚靠的堡壘。

²³ 約束嘴及舌的， 會保守家己免受災害。

²⁴ 驕傲自高的人，名叫做侮慢； 伊做代誌猖狂。

²⁵ 貧憚的人會互家己的慾望害死， 因為伊的手毋肯做工。

²⁶ 有人歸日貪心不知足； 義人慷慨施捨。

²⁷ 歹人獻的祭通厭惡， 何況伊存歹意思來獻。

²⁸ 作偽證的人會滅亡； 照實作證的，無人會當給伊辯倒。

²⁹ 歹人面皮厚； 正直的人行踏謹慎。

³⁰ 人的智慧、聰明，及所有的策略 攏𣍐當對抗上主。

³¹ 馬是為著交戰的日準備； 毋拘勝利是上主啲決定。