Chim-giân 20 - 現代台語譯本漢字版

¹ 薄酒互人放縱，厚酒互人發狂； 因為酒來迷失是無智慧。

² 王大受氣親像獅大聲哮； 惹伊受氣會害著家己的性命。

³ 避免紛爭的人通稱讚， 毋拘戇人愛冤家。

⁴ 貧憚的人無欲照時種作， 收割的時尋無半項。

⁵ 人心內的計謀親像深的水， 只有明理的人才會給伊汲起來。

⁶ 講家己忠誠的人真多， 毋拘忠實的人欲去叨位尋？

⁷ 照正直行的義人， 伊的子子孫孫真有福氣！

⁸ 王坐佇審判的位， 伊的目睭監察攏總的歹。

⁹ 啥人敢講「我已經潔淨我的心， 我的罪已經清氣」？

¹⁰ 用偏人的秤錘，諞人的斗， 攏是上主所厭惡。

¹¹ 囝仔是純潔抑是正直， 對伊的行為看會出。

¹² 會聽的耳孔，會看的目睭， 兩項攏是上主所造。

¹³ 毋通貪眠才免致到散赤； 目睭擘互金才有夠額的米糧。

¹⁴ 人買物的時嫌講「毋好，毋好」， 買了，家己誇口真好。

¹⁵ 雖然有金，閣有真多寶石， 毋拘有智識的嘴唇才是珍寶。

¹⁶ 給生份人擔保，著提家己的衫去做抵押； 替外人保證，著家己承擔後果。

¹⁷ 諞來的食物滋味真好， 後來就親像嘴啲哺沙。

¹⁸ 參詳會互計劃成功； 好的策略會互交戰勝利。

¹⁹ 四界講人是非的，會漏洩人的祕密； 厚話的，毋通及伊結交。

²⁰ 咒詛父母的， 伊的性命會親像燈佇極烏暗的中間熄去。

²¹ 真緊得著的財富， 到尾無一定是祝福。

²² 毋通講「我欲報冤」； 著聽候上主，伊會救你。

²³ 偏人的秤錘是上主所厭惡； 諞人的天秤嘛毋好。

²⁴ 人豈會知伊家己的路？ 人的腳步是上主啲決定。

²⁵ 毋通隨便講「這是欲獻互上帝的物」， 才免下願了煞後悔。

²⁶ 智慧的王親像用簸箕給歹人簸出來， 用車輪給𪜶研過。

²⁷ 人的心靈是上主的燈， 查明家己的心思意念。

²⁸ 慈愛信實保護國王； 伊的座位因為仁慈得著保全。

²⁹ 勇健是少年人的榮光； 白頭毛是老人的光彩。

³⁰ 鞭拍會除去人的罪惡； 拍傷會潔淨人的心思意念。