Chim-giân 2 - 現代台語譯本漢字版

智慧的報賞

¹ 我的子啊，你若接受我的話， 將我的命令囥佇心內，

² 注意聽智慧， 專心求聰明；

³ 你若求明理， 大聲求聰明；

⁴ 若尋伊親像尋銀， 抄尋伊親像抄尋藏啲的寶貝；

⁵ 你就明白欲按怎敬畏上主， 知欲按怎認識上帝。

⁶ 因為上主賜智慧； 知識及聰明攏對伊的嘴出。

⁷ 伊為著正直的人積聚真的智慧， 保護行為端正的人。

⁸ 伊保守正直的人的路， 保護對伊忠信的人的道路。

⁹ 按呢，你就明白公義、公正、公平， 就是導人到一切良善的路。

¹⁰ 智慧會入你的心； 智識會互你的心神歡喜。

¹¹ 策略會保護你； 聰明會保守你，

¹² 救你離開歹路， 脫離歪曲是非的人。

¹³ 彼款人棄拺正直的路， 行烏暗的道路。

¹⁴ 𪜶愛做歹， 意愛歹人的歪曲。

¹⁵ 𪜶的路彎曲， 𪜶的所行偏離正路。

¹⁶ 智慧會互你閃避淫婦， 閃避講思奶話的妓女。

¹⁷ 伊棄拺少年的時的匹配， 𣍐記得伊的上帝的約。

¹⁸ 你入伊的厝就行入死路， 行伊的路就迵到陰府。

¹⁹ 到伊遐的，無一個會當越倒轉， 無一個會閣行轉來活命的路。

²⁰ 按呢，智慧會互你行好人的路， 持守義人的道路。

²¹ 正直的人會徛起佇應允的土地； 無通指責的人會留佇遐。

²² 毋拘歹人會對地面消滅， 奸詐的人會對地上連根摳㧒确。