Chim-giân 19 - 現代台語譯本漢字版

¹ 行為正直的散赤人 較贏講話詭詐的戇人。

² 熱心無智識毋好； 硞硞闖顛倒會走毋著路。

³ 人因為愚戇破壞家己的前途； 伊的心顛倒怨嘆上主。

⁴ 好額，朋友就加真多； 散赤，朋友就攏離開。

⁵ 作偽證一定受刑罰； 講白賊𣍐當逃脫責罰。

⁶ 有權的，人人給伊扶挺； 慷慨的，人人做伊的朋友。

⁷ 散赤人連兄弟都厭惡， 朋友閣較會離開伊； 伊趇欲及人講話，人毋插伊。

⁸ 有智慧才會曉疼惜家己的性命； 珍惜智識會得著福氣。

⁹ 作偽證一定受刑罰； 講白賊會滅亡。

¹⁰ 戇人生活奢華無合； 僕人管轄主人閣較無應該。

¹¹ 人有見識就𣍐快受氣； 無追究人的過失是家己的光榮。

¹² 王的受氣親像獅大聲哮； 伊的恩惠親像草頂的露水。

¹³ 子戇是老父的災禍； 某吵鬧親像雨水㴙㴙滴。

¹⁴ 厝宅財產是祖公所留； 賢慧的某是上主所賜。

¹⁵ 貧憚互人睏重眠； 懶屍的人會枵餓。

¹⁶ 遵守誡命會保全家己的性命； 無致意上主的路會致到死亡。

¹⁷ 賑濟散赤人是借互上主， 上主會照伊的所做還伊。

¹⁸ 趁猶有向望，著管教家己的子， 毋拘毋通過頭煞給伊害死。

¹⁹ 𠢕發大受氣的人一定受處罰； 若欲救伊，一定加了工。

²⁰ 著聽苦勸受教示， 互你到尾有智慧。

²¹ 人心內有真多計劃， 只有上主的旨意會實現。

²² 貪心互人致到見笑； 寧可散赤嘛無愛白賊。

²³ 敬畏上主會得著性命； 伊會安居樂業，𣍐抵著災禍。

²⁴ 貧憚的人手伸到盤裡， 嘛毋肯提到嘴。

²⁵ 拍自高自大的人，會互戇直的人得著教示； 責備明理的人，會互伊得著智識。

²⁶ 歹款待老父，趕老母出去的， 此款子帶來見笑，留臭名。

²⁷ 我的子啊，你若無繼續聽教示， 會偏離智識的話。

²⁸ 作偽證是啲戲弄公平； 歹人用罪惡做飯食。

²⁹ 刑罰是為著自高自大的人準備； 鞭拍是為著戇人的尻脊骿安排。