Chim-giân 17 - 現代台語譯本漢字版

¹ 有一塊仔餅通食，大家和睦， 較贏腥臊滿桌有相爭。

² 𠢕辦代誌的僕人會管轄卸體面的子， 閣會當及主人的子平平分著家伙。

³ 煉銀用鼎，煉金用爐， 毋拘上主鍛鍊人的心。

⁴ 做歹的人注意聽奸詐的話； 講白賊的人愛聽邪惡的言語。

⁵ 恥笑散赤人是侮辱創造𪜶的主； 愛人抵著災禍的一定會受刑罰。

⁶ 子孫是老人的花冠； 老父是子兒的榮耀。

⁷ 戇人講大話無合； 有地位的人講白賊閣較無合。

⁸ 賄賂，送的人看做寶石， 逐條路攏行會通。

⁹ 𣍐記得人的過失會得著友好的回應； 代誌沓沓唸會互親密的朋友疏遠。

¹⁰ 給明理的人講一句責備的話， 較贏給戇人拍一百下。

¹¹ 歹人存心背逆； 毀滅的使者會來給伊對付。

¹² 寧可抵著失落子的熊母， 毋通抵著固執的戇人。

¹³ 用歹報好的， 災禍𣍐離開伊的家。

¹⁴ 相爭一下開始親像水崩隙， 著先制止才𣍐致到氾濫。

¹⁵ 判歹人做無罪，定義人做有罪， 兩項攏是上主所厭惡。

¹⁶ 戇人無想欲買智慧， 手裡提錢有啥路用？

¹⁷ 朋友不時相照顧； 兄弟出世是欲分擔苦難。

¹⁸ 給厝邊答應做擔保， 彼款人是戇人。

¹⁹ 愛犯罪的人愛相爭； 自高驕傲的人自取滅亡。

²⁰ 心思邪惡的人尋𣍐著福氣； 𠢕反話的人會陷落患難。

²¹ 生著戇子是父母的憂悶； 戇人的老父無什麼通歡喜。

²² 歡喜的心是好藥； 憂傷的神互骨枯焦。

²³ 歹人暗中收賄賂， 會互判決失去公正。

²⁴ 智慧佇明理的人的目睭前， 毋拘戇人的目睭尋到地的極頭。

²⁵ 愚戇的子互老父煩惱， 互老母憂苦。

²⁶ 刑罰無辜的人毋好； 打擊正直的官長嘛毋好。

²⁷ 約束言語的有智識； 性情冷靜的是聰明。

²⁸ 戇人若恬恬嘛看做巧； 伊無開嘴嘛算做聰明。