Chim-giân 16 - 現代台語譯本漢字版

¹ 人啲計劃， 上主啲決定。

² 人看家己的所做做著， 毋拘上主審查人的動機。

³ 將你的所做交託上主， 你的計劃就會成功。

⁴ 上主所造的攏有目的， 連歹人滅亡的日嘛是伊的計劃。

⁵ 上主厭惡心驕傲的人； 歹人一定受刑罰。

⁶ 因為慈愛信實，罪過得著遮蓋； 敬畏上主，人通離開邪惡。

⁷ 人的所做若互上主歡喜， 上主會互對敵及伊和好。

⁸ 賺錢少，有公道， 較贏賺錢多無公道。

⁹ 人計劃家己的道路； 上主引導伊的腳步。

¹⁰ 王的嘴講上帝指示的話， 伊的審判就𣍐差錯。

¹¹ 公道的天秤及秤攏屬上主； 袋仔內的秤錘攏是伊所制定。

¹² 做歹是王所厭惡； 王位靠公義建立。

¹³ 公正的嘴唇是王所歡喜； 講話正直是王所意愛。

¹⁴ 王的大受氣親像死亡的使者； 智慧的人會互伊的受氣煞。

¹⁵ 王光彩的面互人有性命； 王的恩惠親像春雨的雲。

¹⁶ 得著智慧比得著金較好； 揀著聰明比得著銀閣較好。

¹⁷ 正直人的大路離開歹； 謹慎家己的腳步會保全性命。

¹⁸ 有驕傲就有失敗； 有自高就有跋倒。

¹⁹ 心謙卑及散赤人做夥住， 較贏及驕傲的人分所搶的物。

²⁰ 聽趁道理，會得著利益； 倚靠上主，真有福氣。

²¹ 心有智慧稱做通達； 講話文雅會互人心服。

²² 聰明人的智慧是伊活命的水泉； 戇人的戇是伊的責罰。

²³ 智慧的人的心約束伊的嘴， 互伊的話加添說服力。

²⁴ 親切的話親像蜜， 互心歡喜，互骨勇健。

²⁵ 有一條路看起來正閣直， 到尾迵到死亡。

²⁶ 做工人為著顧腹肚做工； 腹肚枵逼𪜶拍拼。

²⁷ 流氓計謀欲害人； 伊的嘴唇親像啲𤏸的火。

²⁸ 歪曲是非的人四界製造紛爭； 𠢕學話的人互親密的朋友變面。

²⁹ 強暴的人引誘厝邊， 導𪜶行歹路。

³⁰ 𥍉目示意是啲圖謀邪惡； 嘴唇咬緊表示堅決做歹。

³¹ 白頭毛是榮耀的花冠， 實行公義才會得著。

³² 忍耐贏過威力； 𠢕控制家己較贏征服歸座城。

³³ 人抽籤決定代誌； 最後的決定在佇上主。