Chim-giân 15 - 現代台語譯本漢字版

¹ 溫和的應答互受氣煞； 刺鑿的話激起受氣。

² 智慧人的舌𠢕講智識； 戇人的嘴吐出愚戇。

³ 上主的目睭逐所在啲看， 好歹攏啲監察。

⁴ 溫和的舌是活命的樹； 講話歪曲損傷心神。

⁵ 戇人看輕老父的管教； 願意受責備是明理。

⁶ 義人的厝內有真多財寶； 歹人所賺的成做家己的陷害。

⁷ 智慧人的嘴報揚智識； 戇人的心毋是按呢。

⁸ 歹人獻的祭，上主厭惡； 正直人的祈禱，上主歡喜。

⁹ 歹人的路是上主所厭惡； 追求公義是伊所意愛。

¹⁰ 放拺正路的人會受嚴格管教； 厭惡責備的人會致到死亡。

¹¹ 陰府及滅亡上主都啲監察， 世間人的心閣較𣍐當對伊蓋密。

¹² 自高自大的人無愛受責備， 嘛無愛及智慧的人參詳。

¹³ 心歡喜，面就有笑容； 心憂悶，心靈就餒志。

¹⁴ 聰明人的心尋求智識； 戇人的嘴用愚戇做食物。

¹⁵ 困苦的人，日子歹過； 心快樂的人，親像宴席無斷。

¹⁶ 散赤有啲敬畏上主， 較贏好額有真多煩惱。

¹⁷ 食青菜，大家相疼， 較贏食肥牛仔，互相怨恨。

¹⁸ 歹性地惹起冤家； 無快受氣會互相爭煞。

¹⁹ 貧憚人的路互莿圍啲； 正直人的路大條平坦。

²⁰ 智慧的子互老父歡喜； 戇人看輕家己的老母。

²¹ 無知的人看愚戇做歡喜； 明理的人照正直行。

²² 無參詳，計劃會失敗； 顧問多，就會成功。

²³ 應答合宜互人歡喜； 合時的話實在真好！

²⁴ 智慧的人行上活命的路， 才免落去下面的陰府。

²⁵ 上主拆毀驕傲的人的厝， 保護寡婦的地界。

²⁶ 歹的心思，上主厭惡； 純潔的話，上主意愛。

²⁷ 貪不義之財，陷害家己的家； 拒絕賄賂，會長歲壽。

²⁸ 義人的心想了才應； 歹人的嘴吐出邪惡。

²⁹ 上主離開歹人真遠， 毋拘有啲聽義人的祈禱。

³⁰ 溫柔的眼神互人心歡喜； 好消息互筋骨勇健。

³¹ 聽趁管教的人會長歲壽， 會當及智慧的人做夥徛起。

³² 毋聽警戒是看輕家己； 聽趁管教會得著智慧。

³³ 敬畏上主是教人有智慧； 先有謙卑才有尊榮。