Chim-giân 14 - 現代台語譯本漢字版

¹ 智慧的婦仁人建立家己的家庭； 愚戇的婦仁人親手拆毀。

² 做事正直的人敬畏上主； 做代誌歪斜的人藐視伊。

³ 戇人講話家己受責罰； 智慧的人的話保護家己。

⁴ 無牛耕作就無五穀； 牛有力土產就愈多。

⁵ 誠實的證人𣍐講白賊； 虛假的證人滿嘴胡說。

⁶ 自高自大的人尋智慧，尋𣍐著； 聰明的人真緊得著智識。

⁷ 著離開戇人， 因為對伊講的話尋𣍐著智識。

⁸ 通達的人的智慧互伊了解著行的路； 戇人的戇致到行迷路。

⁹ 戇人看犯罪做滾笑； 正直的人分享上帝的恩惠。

¹⁰ 人的艱苦，只有家己的心知； 伊的歡喜，外人𣍐當分享。

¹¹ 歹人的厝會倒壞； 正直人的布棚會興旺。

¹² 有一條路看起來正閣直， 到尾迵到死亡。

¹³ 人啲笑的時心猶有憂悶； 快樂的結局會變做悲傷。

¹⁴ 歹人一定受報應； 好人一定得報賞。

¹⁵ 戇直的人逐項攏信； 通達的人步步謹慎。

¹⁶ 智慧的人事事謹慎，遠離歹代； 戇人驕傲放肆。

¹⁷ 快受氣的人做代誌愚戇； 詭詐的人互人怨恨。

¹⁸ 戇直的人承接愚戇做產業； 通達的人得著智識做花冠。

¹⁹ 歹人仆落佇好人的面前； 罪人仆落佇義人的門口。

²⁰ 散赤人連厝邊都厭賤； 好額人朋友真多。

²¹ 看輕厝邊的人有罪； 憐憫散赤的人有福氣。

²² 計謀歹代會行入迷路； 計謀好事會得著人的真誠憐憫。

²³ 逐款的拍拼攏有利益； 空談會致到散赤。

²⁴ 智慧的人的財富是𪜶的花冠； 戇人的戇到尾嘛是戇。

²⁵ 講實話作證救人的性命； 作偽證是用詭詐害人。

²⁶ 敬畏上主有堅固的倚靠； 伊的子兒有逃閃的所在。

²⁷ 敬畏上主是活命的水泉， 互人免陷落死亡的羅網。

²⁸ 百姓多，國王有榮光； 人民少，人君就衰敗。

²⁹ 𣍐快受氣是大聰明； 無耐心的顯出愚戇。

³⁰ 心平靜互身體健康； 怨妒互骨頭朽爛。

³¹ 壓迫散赤人是褻瀆創造𪜶的主； 好款待無錢人是尊敬主。

³² 歹人會因為所做的歹滅亡； 義人到死猶有倚靠。

³³ 智慧愛𫢶佇聰明人的心內； 戇人的心內尋無智慧。

³⁴ 公義互國家強盛； 罪惡互人民受凌辱。

³⁵ 王意愛用智慧辦代誌的官員， 責罰失職的人臣。