Chim-giân 13 - 現代台語譯本漢字版

¹ 智慧的子聽趁老父的教導； 自高自大的人毋聽責備。

² 人講好話有好的成果； 奸詐的人圖謀強暴。

³ 約束嘴舌，保全性命； 隨便開嘴，致到毀滅。

⁴ 貧憚的人心欣慕，嘛得𣍐著； 拍拼的人會心滿意足。

⁵ 義人厭惡白賊話； 歹人失體面，留臭名。

⁶ 公義保護正直的人； 邪惡敗壞有罪的人。

⁷ 有人裝做好額，其實無半項； 有人裝做散赤，其實有真多財物。

⁸ 好額人用錢贖命； 散赤人毋驚人威脅。

⁹ 義人的光會明亮； 歹人的燈會熄去。

¹⁰ 驕傲一定起相爭； 聽人苦勸有智慧。

¹¹ 毋是拍拼得著的錢會愈減少； 流汗積聚的錢會愈加添。

¹² 所向望的久無實現，心就痛苦失志； 所意愛的一下實現，性命就充滿活力。

¹³ 藐視教示，自取滅亡； 尊重誡命，得著報賞。

¹⁴ 聰明人的教示是活命的水泉， 互人免陷落死亡的羅網。

¹⁵ 明理的人會受尊重，受接納； 奸詐的人的路嵁硈歹行。

¹⁶ 通達的人用智慧做代誌； 戇人顯露家己的愚戇。

¹⁷ 歹的使者互人陷落災禍； 忠信的差使互人得著醫治救助。

¹⁸ 拒絕教督，會致到散赤見笑； 願意受責備，會受敬重。

¹⁹ 所意愛的實現，心就歡喜； 離開歹代，戇人毋願。

²⁰ 及智慧的人同行就有智慧； 及戇人作伴會受傷害。

²¹ 災禍會追趇罪人； 繁榮是義人的報賞。

²² 好人留產業互子孫； 罪人積聚的財富最後歸義人。

²³ 散赤人的田園生產真多米糧， 毋拘因為無公義煞攏受搶奪。

²⁴ 毋甘責罰子兒是無疼𪜶； 若疼𪜶，就著照時責督。

²⁵ 義人會當食甲心滿意足； 歹人的腹肚不時枵枵。