Chim-giân 12 - 現代台語譯本漢字版

¹ 意愛智識的人歡喜接受管教； 戇人厭惡責備。

² 好人會得著上主施恩； 詭計多端的人會受上主定罪。

³ 人𣍐當對做歹得著安全； 義人的根基永遠𣍐動搖。

⁴ 才德的婦仁人是丈夫的花冠； 毋知見笑的婦仁人親像丈夫骨內的毒瘤。

⁵ 義人的意念四正； 歹人的計謀詭詐。

⁶ 歹人的言論當等欲刣人； 正直人的嘴會救人。

⁷ 歹人會受捙倒消失； 義人的家會堅固。

⁸ 人因為智慧受謳咾； 心歪曲是非會受藐視。

⁹ 卑賤的人賺有食， 較贏膨風自大的人無物通食。

¹⁰ 義人關心伊的牲生的性命； 歹人連對人同情都殘忍。

¹¹ 種作的人有夠額的米糧； 追求空空無價值的事是無智識。

¹² 歹人貪愛邪惡的人搶來的財物； 義人的根會結果子。

¹³ 邪惡的人因為嘴唇的過失跋落家己的羅網； 義人會脫離患難。

¹⁴ 人對嘴所結的果子得著滿滿的福氣； 逐個人照伊的所做受報應。

¹⁵ 戇人看家己的路做著； 聰明的人聽人苦勸。

¹⁶ 戇人真快顯出受氣； 明理的人忍受侮辱。

¹⁷ 講實話作證彰顯公義； 濫糝作證顯出詭詰。

¹⁸ 講話無謹慎親像用刀鑿人； 智慧的人的舌醫治人。

¹⁹ 誠實的嘴永遠可靠； 白賊的舌只有擋一時仔久。

²⁰ 圖謀歹代的人心存詭詐； 勸人和好的人會快樂。

²¹ 義人𣍐抵著災害； 歹人會抵著真多災禍。

²² 白賊的嘴唇，上主厭惡； 做代誌誠實，伊所歡喜。

²³ 明理的人囥密智識； 戇人的心顯露愚戇。

²⁴ 殷勤的手有力掌權； 貧憚的人給人做苦工。

²⁵ 心有掛慮，互人餒志； 一句好話，互人歡喜。

²⁶ 義人導厝邊行正路； 歹人導人行迷路。

²⁷ 貧憚的人有肉嘛無欲烘； 拍拼的人會得著寶貴的財物。

²⁸ 正直的路互人得著性命； 邪惡的路迵到死亡。