Chim-giân 11 - 現代台語譯本漢字版

¹ 欺騙的天秤，上主厭惡； 公平的秤錘，伊所意愛。

² 有驕傲就有見笑； 有謙卑就有智慧。

³ 正直的人有誠實啲引導； 詭詰的人因為奸詐致到毀滅。

⁴ 上主大受氣的日，錢財無路用， 只有公義會救人脫離死亡。

⁵ 無通指責的義人，伊的路直，好行； 歹人會因為家己的邪惡跋倒失敗。

⁶ 正直的人會互家己的義救著； 奸詐的人會陷落家己的歹所設的羅網。

⁷ 歹人一下死，伊的向望就無去， 伊所期待的嘛會消失。

⁸ 義人會當脫離患難； 歹人反轉陷落彼內面。

⁹ 眼中無上帝的人講話害厝邊； 義人因為智識得著解救。

¹⁰ 義人順利亨通，通城歡喜； 歹人滅亡，人攏大聲慶祝。

¹¹ 城因為正直人的祝福興起， 因為歹人的話倒壞。

¹² 藐視厝邊的人無常識； 明理的人靜靜無出聲。

¹³ 四界講人是非的，會漏洩人的祕密； 誠實可靠的人囥密代誌。

¹⁴ 無好的領導，國家就衰敗； 顧問多，人民就安穩。

¹⁵ 給生份人保證會受大剋虧； 拒絕給人擔保就安全。

¹⁶ 賢慧的婦仁人受人敬重； 敗德的婦仁人自取恥辱。 貧憚的查甫人會散赤； 堅強的查甫人會好額。

¹⁷ 仁慈的人家己得著利益； 殘忍的人家己受傷害。

¹⁸ 歹人得著的工錢是空空； 撒義的種籽得著的報賞才是實在。

¹⁹ 堅持公義，得著性命； 繼續做歹，致到死亡。

²⁰ 歪曲是非的心，上主厭惡； 行為正直，伊所意愛。

²¹ 歹人一定受刑罰； 義人的後代會得著解救。

²² 婦仁人媠若無明理， 親像金環掛佇豬的鼻。

²³ 義人所意愛的，最後攏是好； 歹人追求的，惹上帝受氣。

²⁴ 人愈施捨就愈好額； 人愈凍霜就愈散赤。

²⁵ 愛施捨的，愈豐盛； 幫贊人的，得著幫贊。

²⁶ 囤積五穀毋賣，會受咒詛； 歡喜賣出，會受祝福。

²⁷ 出力做好，會得著恩惠； 追求邪惡，會抵著災禍。

²⁸ 倚靠家己的錢財，會跋倒失敗； 義人會興旺親像青翠的樹葉。

²⁹ 惹起家庭紛爭的人，什麼攏得𣍐著； 戇人會做聰明人的奴僕。

³⁰ 義人結的果子是性命； 強暴的人殘害性命。

³¹ 義人佇世間得著報賞； 有罪的歹人一定受報應。