Chim-giân 10 - 現代台語譯本漢字版

所羅門的箴言

¹ 所羅門的箴言： 智慧的子互老父歡喜； 愚戇的子互老母憂悶。

² 不義的錢財攏無利益； 只有公義會救人脫離死亡。

³ 上主𣍐互義人枵餓； 伊會破壞歹人的企圖。

⁴ 貧憚互人散赤； 骨力互人富足。

⁵ 照時收成的是聰明人； 收割的時愛睏的是敗家子。

⁶ 義人的頭殼頂有祝福； 歹人的嘴藏強暴。

⁷ 義人的名聲受稱讚； 歹人一定留臭名。

⁸ 心內聰明，會聽受命令； 嘴講戇話，一定失敗。

⁹ 行路正直，腳步就安穩； 行為不正，到尾會露現。

¹⁰ 惡意使目尾，製造糾紛； 坦白苦勸人，促進和平。

¹¹ 義人的嘴是活命的水泉； 歹人的嘴藏強暴。

¹² 怨恨惹起紛爭； 仁愛遮蓋攏總的過失。

¹³ 明理的人嘴內有智慧； 無知的人的尻脊有箠仔便便啲等。

¹⁴ 智慧的人積聚智識； 戇人的嘴真快致到失敗。

¹⁵ 財富是好額人的保障； 貧困是散赤人的災難。

¹⁶ 義人的報賞是性命； 歹人的工錢是刑罰。

¹⁷ 聽受勸戒，行活路； 棄拺責備，行迷路。

¹⁸ 掩蓋怨恨的人，嘴講白賊； 四界造謠的是戇人。

¹⁹ 厚話難免有過失； 約束嘴舌才是聰明。

²⁰ 義人的舌親像純的銀； 歹人的心無價值。

²¹ 義人的嘴培養真多人； 戇人因為無知死亡。

²² 上主賜的福氣互人富足， 內面無摻憂苦。

²³ 愚戇的人看作惡做快樂； 明理的人看智慧做歡喜。

²⁴ 歹人所驚的，會臨到伊； 義人所意愛的，會得著。

²⁵ 狂風吹過，歹人就消失； 義人會永遠安穩徛在。

²⁶ 差貧憚人做代誌， 親像嘴齒互醋酸著，目睭互煙燻著。

²⁷ 敬畏上主會加添日子； 歹人的年歲會減少。

²⁸ 義人的向望帶來歡喜； 歹人的期待到尾落空。

²⁹ 上主的道路對正直的人是保障， 對做歹的人是毀滅。

³⁰ 義人永遠𣍐動搖； 歹人𣍐當徛起佇應允的地。

³¹ 義人的嘴發出智慧； 歪曲是非的舌會受割斷。

³² 義人講話合宜； 歹人出嘴歪曲是非。