Chim-giân 1 - 現代台語譯本漢字版

箴言的價值

¹ 大闢的子，以色列王所羅門的箴言。

² 諸個箴言會互人得著智慧及教示， 理解深奧的道理；

³ 會互人受教示，用智慧辦代誌， 實踐公義、公正，及公平。

⁴ 諸個話會互戇直的人有靈巧， 互少年人有智識，𠢕計劃；

⁵ 會互有智慧的人聽了加添學識， 互聰明的人得著真的見識；

⁶ 會互人明白箴言及譬喻， 了解智慧的人的話及寓言。

⁷ 敬畏上主是智識的根本； 愚戇的人藐視智慧及教示。

對少年人的勸告

⁸ 我的子啊，著聽老父的教督； 毋通棄拺老母的教示。

⁹ 因為諸個話會做你頭殼頂的花冠， 做你頷頸的金鍊。

¹⁰ 我的子啊，歹人若引誘你， 毋通隨伊去。

¹¹ 𪜶若講：「及阮鬥陣來去， 來去埋伏刣人， 當等無辜的人，來給刣。

¹² 咱親像陰府來給𪜶活活吞落去； 𪜶會親像陷落深坑的人互咱歸個吞落去。

¹³ 咱會當得著逐款的財物， 所搶的囤滿咱的厝。

¹⁴ 你來加入阮的黨， 搶來的財物大家攏有份。」

¹⁵ 我的子啊，毋通隨𪜶去， 著約束你的腳無踏入𪜶的路。

¹⁶ 因為𪜶趕欲做歹， 急欲刣人。

¹⁷ 佇鳥仔的目睭前設羅網， 所做無採工。

¹⁸ 𪜶埋伏欲害人，反轉害著家己， 當等欲傷人，顛倒傷著家己。

¹⁹ 人若不擇手段取得財利， 結局一定失去家己的性命。

智慧的呼聲

²⁰ 智慧佇街路大聲啲叫， 佇市場口大聲啲喝；

²¹ 佇鬧熱的街路頭大聲啲叫， 佇城門口大聲講：

²² 「戇直的人愛戇直欲偌久？ 藐視智識的人愛藐視智識欲偌久？ 愚戇的人厭惡智識欲偌久？

²³ 我責備恁，恁若聽趁， 我欲對恁吐露我的心意， 互恁明白我的話。

²⁴ 我叫，恁毋聽； 我邀請，無人反應；

²⁵ 恁無視我一切的勸戒， 毋肯接受我的責備。

²⁶ 所以，恁抵著患難，我欲冷笑； 恁抵著驚惶，我欲恥笑。

²⁷ 當驚惶親像狂風吹來， 災禍親像捲螺仔風掃來， 患難痛苦臨到恁，

²⁸ 彼時恁欲求叫我，我毋聽， 迫切尋我，尋𣍐著。

²⁹ 因為恁厭惡智識， 無愛敬畏上主，

³⁰ 毋聽我的勸戒， 藐視我的責備，

³¹ 所以恁會食家己所種的歹果子， 家己計謀的惡果食甲飽閣厭。

³² 戇直的人會互家己的固執害死； 愚戇的人會因為自滿致到滅亡。

³³ 毋拘聽趁我的話的人會安穩徛起， 免驚災禍，享受平安。」