A-mô͘-sū-su 7 - 現代台語譯本漢字版

草蜢的異象

¹ 至高的上主互我看見一個景象：王家的農作物收割了，閣發新芛的時，上帝造一群草蜢。

² 草蜢給境內的農作物攏食了，我就講：「至高的上主啊，求你赦免；以色列𣍐當閣活落去啦，因為𪜶微細軟弱。」

³ 上主因為按呢改變心意，就講：「此個事𣍐發生。」

火的異象

⁴ 至高的上主閣互我看見一個景象：至高的上主命令火來處罰；火給深淵燒焦，閣燒毀全地。

⁵ 我就講：「至高的上主啊，我求你，請停止！以色列𣍐當閣活落去啦，因為𪜶是微細軟弱。」

⁶ 上主因為按呢改變心意。至高的上主就講：「此個事嘛𣍐發生。」

墜繩的異象

⁷ 伊閣互我看見一個景象：主手提墜繩，徛佇照墜繩起的牆頂面。

⁸ 上主對我講：「阿摩司，你看見什麼？」 我應講：「我看見墜繩。」 主講：「我欲用墜繩量我的子民以色列；我𣍐閣放𪜶煞。

⁹ 以撒的山頭壇會荒廢，以色列的聖所會拋荒；我欲起來，用刀攻擊耶羅波安王朝。」

阿摩司及亞瑪謝

¹⁰ 伯特利的祭司亞瑪謝派使者去給以色列王耶羅波安講：「阿摩司佇以色列中間煽動人反對你；伊的言論對國家不利。

¹¹ 因為伊講：『耶羅波安會互人刣死，以色列人一定會流亡離開本國。』」

¹² 亞瑪謝閣對阿摩司講：「你此個先見，給我出去，倒轉去恁本國猶大，佇遐賺食，佇遐講預言。

¹³ 毋通閣佇伯特利講預言；因為遮有王的聖所，有王家的宮殿。」

¹⁴ 阿摩司應亞瑪謝講：「我毋是先知，嘛毋是先知的徒弟；我是飼羊的，嘛啲照顧桑材樹。

¹⁵ 我啲顧羊群的時，上主呼召我，給我講：『你去，對我的子民以色列傳達我的話。』

¹⁶ 按呢，亞瑪謝，你著聽上主的話。你講『毋通傳達上帝的話反對以色列，毋通講話攻擊以撒的家』，

¹⁷ 所以，上主按呢講：『你的某會佇城內做娼妓；你的子查某子會死佇刀下；你的土地會互人分割佔去；你家己會死佇外國；以色列人一定會流亡離開本國。』」