A-mô͘-sū-su 3 - 現代台語譯本漢字版

先知的任務

¹ 以色列人啊，著聽我上主責備恁的話： 恁全家是我對埃及地導出來的；

² 佇地上萬族中我只有揀恁， 所以我欲因為恁所犯一切的罪刑罰恁。

³ 兩個人若無相約， 哪會鬥陣行？

⁴ 獅若無獵物， 豈會佇樹林內哮？ 獅仔豚若無得著食物， 豈會佇洞內出聲？

⁵ 活罩若無囥餌， 哪會當著鳥仔？ 若無踏著機關， 活罩哪會合起來？

⁶ 城內若有哨角的聲， 住民豈𣍐驚？ 城內若有災禍， 豈毋是上主所降？

⁷ 至高的上主計劃欲做代誌， 一定會代先指示伊的僕人先知。

⁸ 獅啲哮， 啥人𣍐驚？ 至高的上主講話， 啥人敢無傳達？

撒馬利亞的結局

⁹ 著佇亞實突的宮殿 及埃及的宮殿宣布： 著佇撒馬利亞的山聚集， 看城內的大擾亂 及內面欺壓人民的事。

¹⁰ 因為𪜶𣍐曉做正直的代誌； 𪜶的宮殿囤滿用強暴搶來的物。 上主按呢宣告。

¹¹ 所以至高的上主按呢講： 有對敵欲來圍困此個地， 攻破你的防衛線， 搶你的宮殿。

¹² 上主按呢講：親像牧者對獅的嘴搶出來的，干焦兩支羊腳，抑是一塊仔耳仔，佇撒馬利亞過奢侈生活的以色列人，會當逃脫的嘛是赫呢少。

¹³ 至高的上主 — 萬軍的統帥上帝講： 著聽，著警告雅各的後代。

¹⁴ 我因為以色列人犯罪給𪜶刑罰彼日， 我欲毀壞伯特利的祭壇； 壇的角會受斬斷，落落地。

¹⁵ 我欲拆毀𪜶冬天熱天的別莊； 象牙妝飾的厝會受毀滅， 連大間厝都會無去。 上主按呢宣告。