A-mô͘-sū-su 2 - 現代台語譯本漢字版

對摩押

¹ 上主按呢講： 「摩押人一遍閣一遍犯罪， 我一定欲刑罰𪜶； 因為𪜶將以東王的骨頭燒甲變火灰。

² 我欲放火燒摩押， 燒毀加略的宮殿； 摩押會佇嘩嘩哮喝喊歕哨角的中間死亡。

³ 我會將摩押的統治者處死， 刣死王及伊所有的官員。」 上主按呢宣告。

對猶大

⁴ 上主按呢講： 「猶大人一遍閣一遍犯罪， 我一定欲刑罰𪜶； 因為𪜶拒絕上主的律法， 無守伊的規例； 𪜶隨𪜶的祖先拜假神， 受引誘行迷路。

⁵ 所以我欲放火燒猶大， 燒毀耶路撒冷的宮殿。」

上帝審判北國以色列

⁶ 上主按呢講： 「以色列人一遍閣一遍犯罪， 我一定欲刑罰𪜶； 因為𪜶為著銀出賣義人， 為著一雙鞋賣散赤人。

⁷ 𪜶踐踏散赤人的頭殼， 親像啲踏土粉； 𪜶剝奪困苦人的權利； 老父及子公家一個少女， 致到褻瀆我的聖名。

⁸ 𪜶佇逐個祭壇邊， 用散赤人提來抵押的外衫做床巾； 佇𪜶的上帝的殿， 飲剝削得著的錢買的酒。

⁹ 我曾佇𪜶面前除滅亞摩利人； 許個人高大親像柏香樹， 勇壯親像橡樹； 總是我毀掉𪜶頂面的果子， 斬斷𪜶下面的根。

¹⁰ 我嘛有帶恁對埃及地出來， 四十年久導恁經過曠野， 互恁得著亞摩利人的地做產業。

¹¹ 我對恁的子孫中間揀選先知， 閣對恁的少年人中間選立拿細耳人。 以色列人啊，豈毋是按呢？」 上主按呢宣告。

¹² 「毋拘恁互拿細耳人飲酒， 禁止先知傳達上帝的話。

¹³ 所以，我欲給恁扼佇土腳， 親像載滿麥捆的車給恁硩甲𣍐振動。

¹⁴ 逃命的走𣍐離， 勇壯的失去氣力， 勇士嘛𣍐當救家己；

¹⁵ 射箭的徛𣍐在， 腳緊的走𣍐赴， 騎馬的嘛𣍐當救家己的性命。

¹⁶ 佇彼日，連上勇敢的戰士嘛會放拺武器逃走。」 上主按呢宣告。