A-mô͘-sū-su 1 - 現代台語譯本漢字版

¹ 下面是提哥亞一個顧羊人阿摩司的話。烏西亞做猶大王，約華施的子耶羅波安二世做以色列王的年間，就是大地動前兩年，上帝給阿摩司啟示有關以色列的事。

² 阿摩司講： 「上主對錫安親像獅啲哮， 對耶路撒冷親像雷啲彈； 顧羊人的草埔焦去， 迦密的山頂攏枯焦。」

上帝對列國的審判 對敘利亞

³ 上主按呢講： 「大馬士革人一遍閣一遍犯罪， 我一定欲刑罰𪜶； 因為𪜶虐待基列人， 親像用鐵齒枋研五穀。

⁴ 所以，我欲放火燒哈薛的王宮， 燒毀便‧哈達的宮殿。

⁵ 我欲挵斷大馬士革城的門閂， 欲消滅亞文平原的住民， 以及伯‧伊甸的統治者， 將敘利亞人掠去吉珥。」 上主按呢宣告。

對非利士

⁶ 上主按呢講： 「迦薩人一遍閣一遍犯罪， 我一定欲刑罰𪜶； 因為𪜶掠所有的住民， 賣互以東人做奴才。

⁷ 所以，我欲放火燒迦薩的城牆， 燒毀伊的宮殿。

⁸ 我欲消滅亞實突的住民， 以及亞實基倫的統治者； 我欲伸手攻擊以革倫， 直到所賰的非利士人攏滅亡。」 至高的上主按呢宣告。

對泰爾

⁹ 上主按呢講： 「泰爾人一遍閣一遍犯罪， 我一定欲刑罰𪜶； 因為𪜶掠歸族的住民， 賣互以東人做奴才， 無遵守及友邦所定的盟約。

¹⁰ 所以，我欲放火燒泰爾的城牆， 燒毀伊的宮殿。」

對以東

¹¹ 上主按呢講： 「以東人一遍閣一遍犯罪， 我一定欲刑罰𪜶； 因為𪜶用刀劍追殺家己的兄弟， 一點仔都無憐憫的心， 𪜶發性地無停， 起受氣無煞。

¹² 所以，我欲放火燒提幔， 燒毀波斯拉的宮殿。」

對亞捫

¹³ 上主按呢講： 「亞捫人一遍閣一遍犯罪， 我一定欲刑罰𪜶； 為著欲擴展𪜶的領土， 𪜶破開基列有身的婦仁人。

¹⁴ 所以，佇戰爭哄喝的日， 佇狂風大作的時， 我欲放火燒拉巴的城牆， 燒毀伊的宮殿；

¹⁵ 𪜶的王會受放逐， 王及伊的官員做夥受掠。」 上主按呢宣告。