Ai-ko 5 - 現代台語譯本漢字版

哀求憐憫

¹ 上主啊，求你會記得阮的遭遇， 俯落看阮所受的凌辱。

² 阮的產業落佇生份人的手中； 阮的厝宅互外族人提去。

³ 阮成做無父的孤兒； 阮的老母親像寡婦。

⁴ 阮連飲家己的水嘛著付錢， 連家己欲燃的柴嘛著買。

⁵ 阮親像頷頸掛軛的牛互人趕， 勞碌厭倦，無通歇睏。

⁶ 阮著向埃及及亞述投降， 才食會飽。

⁷ 阮的祖先犯罪；今𪜶嘛已經無佇啲啦， 毋拘阮煞因為𪜶的罪受苦。

⁸ 做奴才的人管轄阮， 嘛無人救阮脫離𪜶的手。

⁹ 曠野有強盜， 阮著冒性命的危險尋食。

¹⁰ 阮因為枵餓發熱， 皮膚烏親像火爐。

¹¹ 婦仁人佇錫安受強暴， 少女佇猶大的城鎮受凌辱。

¹² 阮的領袖互人吊起來； 老人無受尊重。

¹³ 少年人受迫挨石磨； 囝仔因為揹柴跋倒。

¹⁴ 老人無閣佇城門口聚集； 少年人無閣彈琴作樂。

¹⁵ 阮的心無閣有喜樂； 跳舞變做哀哭。

¹⁶ 阮的王冠對頭殼落落來； 阮犯罪，阮有災禍啦。

¹⁷ 阮因為諸個事心煩意亂； 目屎互阮的目睭濛霧。

¹⁸ 錫安山已經拋荒， 豺狼佇遐賴賴趖。

¹⁹ 上主，你永遠存在； 你的統治直到萬世代。

²⁰ 你是按怎一直𣍐記得阮？ 你是按怎長期棄拺阮？

²¹ 上主啊，求你互阮回心轉意， 互阮越頭歸向你。 求你換新阮的性命，親像早時的日子！

²² 你哪通永遠受氣阮？ 你哪通永遠棄拺阮？