Ai-ko 4 - 現代台語譯本漢字版

陷落後的耶路撒冷

¹ 啊，黃金竟然暗淡無光， 純金竟然失去光彩！ 聖殿的石頭竟然散甲歸街路。

² 錫安尊貴的子民價值親像純金， 現在煞互人看做燒瓷師傅做的粗瓷。

³ 豺狼猶久互伊的子𠲿奶， 我的子民竟然殘忍親像曠野的鴕鳥。

⁴ 食奶的嬰仔無奶通𠲿， 嘴焦甲嘴舌黏佇頂顎； 囝仔討食物， 連一屑仔都無人分互𪜶。

⁵ 平時食山珍海味的人， 現在餓死佇街路； 過去生活奢侈的人， 現在佇糞埽堆尋物食。

⁶ 上帝一目𥍉久毀滅所多瑪， 無用人的手； 我的子民的罪， 比所多瑪住民的罪閣較重。

⁷ 過去，錫安的拿細耳人比雪較白， 比奶較純； 𪜶的身軀比紅寶石較紅， 生做媠親像藍寶石。

⁸ 現在，𪜶的面比火炭較烏， 消瘦落肉， 瘦甲親像柴； 𪜶佇路裡無人會認得。

⁹ 互人刣死的比餓死的較好； 餓死是無食物，慢慢消瘦來死。

¹⁰ 我的子民受毀滅的時， 連仁慈的老母都煮家己的子食！

¹¹ 上主發大受氣， 摒出腹內的烈火， 用火燒錫安， 連地基嘛給伊燒毀。

¹² 世間的君王及地上的住民， 攏𣍐當相信 有對敵會當攻入耶路撒冷的城門。

¹³ 這攏是因為𪜶先知的罪惡及祭司的罪孽； 𪜶刣死城內公義正直的人。

¹⁴ 𪜶親像盲人佇街路四界踅， 歸身軀沐甲全全血， 無人敢摸著𪜶的衫，恐驚無清氣。

¹⁵ 人喝𪜶：走！閃開！ 恁諸個無清氣的人，倚來！ 𪜶變做難民四界流浪， 無一個國家肯收留𪜶。

¹⁶ 上主親身給𪜶趕散， 無閣看顧𪜶； 祭司無受看重， 長老無受尊重。

¹⁷ 阮看甲目睭花，猶看𣍐著救助的向望； 阮聽候閣再聽候的， 竟然是一個無力解救阮的國家。

¹⁸ 對敵追蹤阮的腳步， 害阮毋敢佇街路行。 阮的日子滿啦！ 阮的結局到啦！

¹⁹ 追趇阮的人比空中啲飛的鷹鳥較緊； 𪜶佇山裡追趇阮， 佇曠野埋伏聽候阮。

²⁰ 上主抹油選立的君王是阮的性命； 阮曾按呢想： 佇伊的保護下，阮會當佇列國中生存。 毋拘伊落佇陷坑互人掠去。

²¹ 以東人，烏斯的住民啊， 出在恁歡喜快樂！ 苦杯嘛會輪到恁飲； 恁欲飲甲酒醉，赤身露體。

²² 錫安啊，你罪過的刑罰已經滿， 上主𣍐閣互你受放逐。 以東啊，上主欲刑罰你， 欲暴露你的罪惡。