Ai-ko 3 - 現代台語譯本漢字版

刑罰、悔改、向望

¹ 我互上主受氣的柺刑罰， 受盡苦痛。

² 伊趕我入去烏暗， 四面無光。

³ 伊一再下手拍我， 歸日無停。

⁴ 伊互我消瘦落肉； 伊遏折我的骨頭。

⁵ 伊用悲慘包圍我， 用苦楚攻擊我。

⁶ 伊互我住佇烏暗中， 親像已經死真久的人。

⁷ 伊用牆圍困我，互我𣍐當逃脫； 伊用真重的銅鍊給我縛啲。

⁸ 我哀求呼叫， 伊毋聽我的祈禱。

⁹ 伊用拍過的大石擋我的路， 互我的路嵁硈彎曲。

¹⁰ 伊親像埋伏的熊， 嘛親像匿啲的獅，聽候欲攻擊我。

¹¹ 伊迫我離開大路， 給我拆碎，放佇邊仔。

¹² 伊開弓， 給我當做紅心射。

¹³ 伊用箭袋內的箭， 射入我的心。

¹⁴ 我成做萬民的笑柄； 𪜶歸暝歸日作歌恥笑我。

¹⁵ 伊用苦菜強迫我食， 用苦酒強迫我飲。

¹⁶ 伊用碎石仔磨斷我的嘴齒， 用土沙粉蓋我。

¹⁷ 我的生活失去平安； 我已經𣍐記得幸福是什麼。

¹⁸ 所以我講：我的元氣消失， 毋敢閣期待上主解救我。

¹⁹ 回想我的痛苦及流浪， 親像啲食苦菜，飲苦酒。

²⁰ 想起諸個事， 我的心沉重鬱卒。

²¹ 毋拘當我想起此件事， 我就閣有向望：

²² 上主的慈愛永遠存在， 伊的憐憫永𣍐斷絕，

²³ 逐早起換新； 你的信實廣大。

²⁴ 我的心講：上主是我一切福氣的源頭， 所以我欲向望聽候伊。

²⁵ 信靠伊，尋求伊的人， 上主施恩互𪜶。

²⁶ 人著吞忍聽候上主的救恩， 因為這是好。

²⁷ 人應該佇少年的時背伊的軛， 因為這是好。

²⁸ 人著家己一個恬恬坐啲， 這是上主互伊的軛。

²⁹ 人應該面仆佇土腳， 按呢可能猶有向望。

³⁰ 著據在人巴嘴䩃， 忍受一切的凌辱。

³¹ 主𣍐永遠棄拺人。

³² 伊雖然互人憂愁， 猶原會照伊豐盛的慈愛憐憫人。

³³ 伊毋甘互人受苦， 互人憂傷。

³⁴ 所有受掠的互人踐踏壓制， 主一定關懷！

³⁵ 至高者所賜的人權受剝削， 主一定關懷！

³⁶ 人佇法庭受冤枉， 主一定關懷！

³⁷ 若毋是主的旨意， 人豈會當有什麼成就？

³⁸ 災禍抑是祝福， 豈毋是攏出佇至高者的命令？

³⁹ 人因為家己的罪受刑罰， 有什麼通埋怨？

⁴⁰ 咱著反省檢討家己的行為， 越轉歸向上主。

⁴¹ 咱著向天頂的上帝， 誠心攑手祈禱。

⁴² 阮犯罪背逆， 你無赦免阮。

⁴³ 你發大受氣，追趇阮； 你下手剿滅阮，攏無留情。

⁴⁴ 你匿佇密雲內底， 阮的祈禱𣍐當透到你遐。

⁴⁵ 你互阮成做渣滓糞埽， 佇萬民中受棄拺。

⁴⁶ 阮所有的對敵 攏大聲攻擊阮。

⁴⁷ 阮抵著驚惶及陷阱， 經歷死亡及毀滅。

⁴⁸ 為著同胞受毀滅， 我的目屎親像江河直直流。

⁴⁹ 我的目屎直直流， 流𣍐停，

⁵⁰ 直到上主看顧， 對天憐憫。

⁵¹ 看見城內婦女的遭遇， 我的心非常痛苦。

⁵² 敵人無緣無故追趇我， 親像啲掠雀鳥仔。

⁵³ 𪜶欲互我死，活活㧒落深坑， 閣用石頭塞牢坑口。

⁵⁴ 水淹過我的頭殼； 我想：我無命啦！

⁵⁵ 上主啊， 我對深坑底求叫你的名。

⁵⁶ 你曾聽我的祈求； 求你毋通塞密耳孔， 毋聽我喝救的聲。

⁵⁷ 我呼求的時，你有倚近我， 給我講：毋免驚！

⁵⁸ 主啊，你曾替我申冤， 贖回我的性命。

⁵⁹ 上主啊，你有看見我受委屈； 求你宣判我正直無罪。

⁶⁰ 你知對敵按怎怨恨我， 圖謀欲害我。

⁶¹ 上主啊，你有聽見𪜶詈罵我； 知影𪜶害我的計謀。

⁶² 你聽見我的對敵歸日攻擊我的話， 及𪜶欲陷害我的陰謀。

⁶³ 你看，對早起到暗暝， 𪜶不時唱歌睥相我。

⁶⁴ 上主啊， 求你照𪜶的行為報應𪜶。

⁶⁵ 求你互𪜶心硬， 給𪜶咒詛。

⁶⁶ 求你發大受氣追趇𪜶， 給𪜶對上主你的地消滅。