Ai-ko 1 - 現代台語譯本漢字版

耶路撒冷的悲傷

¹ 唉啊！此個早前人揢人的城市， 現在竟然拋荒。 早前佇列國受敬重的， 現在竟然親像寡婦。 早前佇逐城市做王后的， 現在竟然落魄甲做奴隸。

² 伊歸暝哀哭，滿面目屎。 早前的愛人， 現在無一個來安慰。 伊的朋友出賣伊， 變做伊的對敵。

³ 猶大流亡佇外邦， 受苦，做苦工。 𪜶住佇列國， 𣍐當安然徛起； 𪜶受圍困， 無路逃脫。

⁴ 迵到錫安的大路哀傷， 因為無人來過節； 所有的城門荒廢， 祭司哀嘆， 少女悲傷； 錫安鬱卒痛苦。

⁵ 伊的對敵變做主人； 伊的仇人繁榮聳勢。 因為伊一遍閣一遍背叛， 上主互伊受苦； 伊的囝仔互對敵掠去。

⁶ 錫安的榮華已經消失。 伊的領袖親像尋無草場的鹿； 𪜶閃避追趇𪜶的人， 毋拘無力通走。

⁷ 耶路撒冷困苦流浪的時， 回想伊早前的榮華。 伊的住民落佇對敵的手頭， 無人救助伊。 對敵看見伊淪陷， 諷刺恥笑伊。

⁸ 耶路撒冷犯大罪， 成做人的笑柄。 早前尊重伊的人， 看伊現在赤身露體，就藐視伊。 伊家己哀嘆， 見笑走去匿。

⁹ 伊的污穢滒著伊的裙； 伊毋曾想著家己的結局。 伊的墮落互人著驚； 無人安慰伊。 上主啊，求你看我的苦難， 因為我的對敵啲對我聳鬚。

¹⁰ 對敵伸手搶奪伊全部的財寶； 伊看著外族人侵入聖殿， 就是上主禁止𪜶入去的所在。

¹¹ 人民哀嘆吐氣，四界尋食， 為著救性命，提財寶換食物。 上主啊，求你俯落看， 看我變做即呢悲慘！

¹² 恁諸個過路人，恁豈攏無要緊？ 恁四面觀察， 豈有人親像我按呢受苦楚？ 這是上主大受氣的時互我承受的痛苦。

¹³ 伊對頂面降火 佇我的骨頭內面啲燒。 伊設羅網纏我的腳， 互我跋倒退後。 伊放我孤單， 互我歸日悲慘。

¹⁴ 伊將我罪過的軛 縛佇我的頷頸， 互我精力焦去。 主將我交佇我無力對抗的對敵手中。

¹⁵ 主棄拺我所有的勇士； 伊召集大軍攻擊我， 硩碎我的少年人。 主踐踏我的人民， 親像佇酒窟踏葡萄仝款。

¹⁶ 我為著諸個事啼哭， 我的目屎直直流。 無人佇身邊安慰我； 無人互我閣再得著氣力。 我的人民孤苦無助， 因為我的對敵刣贏我。

¹⁷ 錫安伸雙手祈求， 毋拘無人安慰伊。 講著雅各，上主已經下令， 互四周圍的人成做伊的對敵； 𪜶將耶路撒冷看做污穢的物。

¹⁸ 上主公義， 毋拘我違背伊的命令。 萬國的人民，請聽， 請看我所受的痛苦： 我的少女、我的青年攏受掠去！

¹⁹ 我給朋友求援助， 毋拘𪜶欺騙我。 我的祭司及長老尋食欲救性命， 煞斷氣死佇城內。

²⁰ 上主，你看咧， 我即呢不幸痛苦！ 我的腸仔絞滾， 我的心肝結歸球， 因為我大大背逆。 佇街路有凶殺， 佇厝內有死亡。

²¹ 人聽著我哼哼呻， 毋拘無人安慰我。 對敵聽見我抵著的災禍， 攏因為你刑罰我來歡喜。 願你宣告的日子來到， 互對敵及我像款受苦難。

²² 願你看見𪜶所做的邪惡， 給𪜶刑罰， 親像你因為我的罪過刑罰我像款。 我因為哀嘆無煞， 我的心神衰荏。