Yokhana 3 - Mewar Alqawarang

Nikodemu a Ɓa she Yesu

¹ Khuski nggur a nje nu̱ke ɗya Parise dlu̱man za Nikodemu, yang ɗya da chele nduki nu̱ke a mbu̱ tabar ɓu̱ nduk kudaandi ɓu̱ Yakhudekwang.

² Ta ɓa she Yesu mbu̱ virkiri za, “Maalu̱m, chem wa zu̱n za to maalu̱m nu̱ Magham a ru̱kki ro. Ku̱me nduk a nje nu̱ke ka ɗu̱maki shi ɗye lazhamku nu̱ke ta shiran nang ɓa kope Magham a nje su̱yen ndu̱ chin.”

³ Tu̱ Yesu tlogha yenda za, “Zhire, zhire, nga zu̱ran yoro mbu̱ nu̱ gaɓ tu̱ kha nduk nu̱ si zu̱m ɓa ɓu̱ na kwaaɗar ɓu̱ Magham ɓa.”

⁴ Tu̱ Nikodemu zham nda za, “Ka kha nduk kikimndi qu̱rse wa geema? Ka gaɓ kya nu̱ mbe man kom tu̱ kha nda zu̱m mu?”

⁵ Tu̱ Yesu tlogha yenda za, “Zhire zhire nga zu̱ran yoro, mbu̱ nu̱ kha nduk nu̱ ku̱nshe ɗyim ndu̱ Jiimba ɓa, ɓu̱ vi nu̱ mbu̱ kwaaɗar ɓu̱ Magham ɓa.

⁶ Ɗyi nu̱ nduk khaki ɗya nduku, yang ɗyi nu̱ Jiimba khaki ɗya Jiimba.

⁷ Shi na lazham ɗyi nang zu̱ki yor nga za, ‘Kope wa gaɓ tu̱ kha nwa’ ɓa.

⁸ Khu̱kheeti wa ka pi ye maa nu̱ shimki, tun wa ka tu̱k su̱quran, yang nun zu̱n maa nu̱ ɗa viki si ndu̱ maa nu̱ke a yir su̱ zu̱m ɓa. Njif nu Jiimba khaki nda ba wanang tu̱k.”

⁹ Tu̱ Nikodemu zham nda za, “Yang nang ka shi kikimnda?”

¹⁰ Tu̱ Yesu tlogha za, “To maalu̱man Israila, yang no da mbu̱ ɗyiku nang ɓa?

¹¹ Zhire, zhire, nga zu̱ran yoro, chem a zu̱kya ɗyi nyem zu̱nki, chem saida ɗyi nyem naki, yang nun dlu̱ saidu ɓaaremang ɓa.

¹² Nga shikya ɓalar ye nu ɗyine ɗyiku nu̱ke a fan larji, yang nun maita ɓa, mbu̱ nga zu̱ ɗyiku nu̱ke a mbu̱ viɗi ye nu, tun ka maita kikimnda?

¹³ Sar da nduk a nje nu̱ dlaki nu̱ viɗ ɓa, kope Yi ɓu̱ Nduk na shurki viɗ ɗyenda.

¹⁴ Ba wa nu̱ Musa daki su̱tang nu̱ viɗi mbu̱ gaarang, wanang tu̱k wa ku̱s ku̱ da Yi ɓu̱ Nduk nu̱ viɗi,

¹⁵ ku̱me aaki maitaki nda ku̱ gwa nyifi nu̱ke ɓu̱ shi woɗa ɓa.”

¹⁶ “Ji Magham wa ndola larji maɗyi, tu̱ vu̱r woi ɓaran khakandi chin ɗyenda, ku̱me aaki nu̱ maitaki nda, ɓu̱ sagha bam ɓa, yang ka gwa nyifi nu̱ke ɓu̱ shi woɗa ɓa.

¹⁷ Ji Magham na ru̱k Yi ɓaran nu̱ mbu̱ larji ma ku̱ kuma larji ɓa, a ru̱k nda ma ku̱ larji ɗana nu̱ ku̱nshe nda.

¹⁸ Aaki maitaki Yi ɓu̱ Magham ɓu̱ kuma nda ɓa, yang kap njif nu̱ zhangki maita nda gha, wa woɗa kuma nda, ku̱me nu̱ maita dlu̱m Yi ɓu̱ Magham khakandi ɗyenda ndang ɓa.

¹⁹ Nang ke kumarang: Yarang a ɓa larji, tu̱ yang nduki ndola zhum maari tu̱ zhang yarangang gha ku̱me tlu̱nar ɓaanda maatlin.

²⁰ Kap njif nu̱ke a tlu̱na ɗyi malkandi wa ka zhang yarangang gha, yang ɓu̱ ɗa ɓa she yarangang zu̱m ɓa ku̱me a sawa ku̱ ɗye shir ɓaran a vi ye dalang ɓa.

²¹ Yang kap njif nu̱ke a tlu̱na zhire wa ka ɗu she yarangang, ma ku̱ nu̱ naran ku zu̱n za chin a shi ɗyikunang ndu̱ shaatar ɓu̱ Magham.”

Saidu nu̱ Yokhana nu̱ Baptisma Shiki ɗyine Yesu

²² Qu̱rsan, tu̱ Yesu ndu̱ nu̱ mburi nda kwang ɗu̱ ku mbu̱ dlar ghai Yakhuda, tu̱ shoɓ nje a baptisme ye nduki.

²³ Yang tu̱k, Yokhana a nje a baptisme Ainon nu̱ke a bing ndu̱ Salim, ku̱me ɗyim a nje khang ye maaran. Tu̱ ndukiku ki yir a baptisme ye wora.

²⁴ (Ɗyinang shi nu̱ khi Yokhana gha zhaaru̱m dong ɓa).

²⁵ Tu̱ keele ji chele ɓu̱ nu̱ mbu Yokhana kwang ndu̱ Yakhude nggur ɗyine me ghai shiɓti ku nu̱ke Yakhudeku ka shiki ma khar shakhshakh.

²⁶ Tu̱ nu̱ mbu Yokhana kwang ɗu̱ she Yokhana ku tu̱ ze nda za, “Maalu̱m, njif nu̱ke ta su̱yen ndu̱ chin ve dlar Gaawu Urdunang nu̱ke to nu̱ ɗyinor saidaki ndang a njig far a baptisme, yang aakya yir she nda.”

²⁷ Tu̱ Yokhana tlogha za, “Nduk a nje nu̱ke ka gwaki aa nu̱m ɓa kope a vu̱r yenda viɗi.

²⁸ Aa tun nu̱ vaanu tun ka saida nga, ku̱me nga ze nu nga za, ‘Nga ke Masiya ɓa, yang a ru̱kti nga ma a ɓa nga gume ɓar ɓaran.’ ”

²⁹ “Wonkhar nu̱ shiki ɓu̱rti mewa ke nokhzi nu̱ zhin ɓu̱rtang, raptikir ɓu̱ nu̱ zhin ɓu̱rti nu̱ke a nje ye maa ɓu̱rtang ka bu ma tu̱k su̱qur nu̱ zhin ɓu̱rtang. Wa ka kasha maɗyi mbu wa tu̱k nu̱ zhin ɓu̱rtang wa shi ɓalari. Wanangang tu̱k kashar ɓang wa nyedli.

³⁰ Yang wa ku̱s ku̱ ki shaatari, ɓang yang ngga ku̱s ba katari.”

Njif na Shurki Viɗi

³¹ “Njif na shurki viɗi wa duk aaki. Aakya viki larji ɗya ɓu̱ larji, yang a shikya ɓalar ɓu̱ ɗyin larji tu̱k. Njif na ɓa ki viɗi wa duk aaki kap.

³² A saida kya ɗyi nyin naki chin tu̱ki, yang kap ndu̱ nang nduk a nje nu̱ dlu̱ki saidu ɓaranang ɓa.

³³ Yang kap njif nu̱ dlu̱ki saidu ɓaran wa wuɗ nu̱ ɗyine Magham ɗya nu̱ zhire.

³⁴ Jiwa chin nu̱ Maghamang ru̱kkyang a zu̱kya ɓalar ɓu̱ Magham, ku̱me Magham wa vu̱r Jiimbi ɓaran yenda koɗokhsi ɓa.

³⁵ Zhinkirang a ndola Woyang, wa vu̱r aa nu̱m nu̱ mbu̱ kharan.

³⁶ Aaki kya maita Woyang, wa gwa nyifi nu̱ke ɓu̱ shi woɗa ɓa. Yang aaki nu̱ zhangki Woyang, ɓu̱ na nyifi ɓa, yang shokhnar ɓu̱ Magham a nje kharan ɗyine nda.”