Yokhana 15 - Mewar Alqawarang

Yesu ke Qu̱far Anap Yelndi

¹ “Nga ke qu̱far anap yelndi, Zhinkir ɓang ke nu̱ ghutang.

² Aa nyi me bu̱n qu̱far nu̱ke nu̱ kha woi mbya ɓa, ka ku̱rta nu̱ gha. Aa nyi bu̱n nu̱ khaki woi, ka shaata kwaɗa nda nu̱ gha ma ku̱ shaata khar woi.

³ Aa leendang tun shakhshakh ku̱me ɓalar nang zu̱ki ye nu.

⁴ Kha ma nu̱ mbya, tang khan mbe nu. Ba wa nu̱ke bu̱n qu̱far anap ɓu̱ ɗu̱ma kha woi waare man qu̱far anapang ɓa, wanang tu̱k tun ɓu̱ ɗu̱ma kharan ɓa kope tun wa khan mbya.

⁵ “Nga ke qu̱far anapang tun ke me bu̱n qu̱farang. Njif nu̱ khaki nu̱ mbya nga mbe nda, chin ka khaki qusonggi khang. Jiwa mbu̱ tun a su̱yen ndu̱ nga ɓa, tun ɓu̱ ɗu̱ma shi aa nu̱m ɓa.

⁶ Kap njif nu̱ke nu̱ khan mbya ɓa, a shipa bu̱n qu̱far nu̱ ɗatlki tu̱ mbuk gha tu̱ ghwari. Nduki ka taba poonan tu̱ gu̱n ɓai nu̱ si, tu̱ va wor nu̱ gha.

⁷ Mbu̱ tun wa khan mbya, tu̱ ɓalar ɓang khan mbe nu, tun ka khuɗ ɗyi nu̱ke tun a shimndan kap, ka shi ye nu.

⁸ Shi ma ɗyi nu̱ke Magham a shimndan, ma wut nu za tun nu̱ mburi nga, ku̱me nang ke ɗyi nu̱ke kaɗa ɓa ki ndu̱ zhaaji ye Zhinkir ɓanga.”

⁹ “Ba wa nu̱ Zhinkirang ndolaki nga, nga ndola nu wanang tu̱k. Kha man mbu̱ ndolar nang wutki ye nu.

¹⁰ Nga mbu zu̱r ɓu̱ Zhinkir ɓang tang khan mbu̱ ndolar ɓaran tu̱k. Wanang tu̱k mbu̱ tun wa mbu Woparku ɓang tun ka khan mbu̱ ndolar ɓanga.

¹¹ Nga zu̱ wanang ma ku̱ kashar ɓang khan mbe nu, tu̱ kashar ɓaanu kha nyeedlan tu̱k.

¹² Zu̱r ɓang ye nu, na ke, ndola ma yen wa nang ndolaki nu.

¹³ Ndolar a nje nu̱ dukki nang ɓa, ku̱ nduk vu̱r nyifi ɓaran ku̱me raptan.

¹⁴ Tun rapta mbu̱ tun wa shi ɗyi nang zu̱ki ye nu.

¹⁵ Ngam ɓu̱ qaanu ye rafa tu̱k ɓa, ku̱me ye rafa nu̱ zu̱n ɗyi nu̱ke nu̱ rafti ɓaran a shiran ɓa. Yang nga qa nu raptaku, ku̱me nga zu̱ ɗyi nang tu̱kki she Zhinkir ɓang kap ye nu.

¹⁶ Tun datki nga ɓa, nga datki nu, tang sa nga za ɗu̱ nu tun a tlu̱na ɗyiku mbarkandi, qusonggi nu̱ke ka khaki koɗokhsi ɓa. Kom Zhinkirang ka vu̱r ɗyi nun khuɗki mbu̱ dlu̱ma ye nu kap.

¹⁷ Ɓalar nang zu̱ki ye nu chin ke ndola ma yen.”

Zhangndi ɓu̱ Larji

¹⁸ “Mbu̱ larji wa zhangndo nu, zu̱n ma nu̱ ɗyine wa zhangndi nga me ku̱ zhangndo nu.

¹⁹ Mbu̱ tun ɓu̱ larji tu̱ga larji wa shim ɗyi ɓaran, yang ku̱me tun ɓu̱ larji ɓa. Nga daato nu mbu̱ larji, nang ke ɗyi nu̱ saki tu̱ larji ki zhangndo nu.

²⁰ Kor ma nu̱ ɗyi nang zu̱ki ye nu za, ‘Ye rafa nu̱ka duk nu̱ rafti ɓaran ɓa.’ Mbu̱ wa vu̱r bonye ya ku, wanang tu̱k ka vu̱r bonye ye nu. Mbu̱ wa mbu zu̱r ɓang ku, tu̱ga ka mbu zu̱r ɓaanu tu̱k.

²¹ Ka shi ɗyikunang ye nu kap ku̱me dlu̱ma, ku̱me nu̱ zu̱n njif nu̱ ɗa ru̱kki nga ɓa.

²² Mbu̱ na nga ɓa tang shi ɓalar ye wor ɓa, tu̱ga sola ve wor ɓa. Yang leendang me ve wor ɗyine solar ɓaanda ɓa.

²³ Njif nu̱ zhangki nga gha, wa zhan Zhinkir ɓang gha tu̱k.

²⁴ Nga shi ɗyiku khang chele ɓaanda nu̱ke sar da njif nggur a nje nu̱ shiki ɓa. Mbu̱ nang shi tlu̱nar ku nang ɓa, tu̱ga sola ve wor ɓa. Yang leendang wa woɗa na ɗyiku nang shiki, yang kap ndu̱ nang tu̱ zhangndi nga gha ku, tu̱ yang zhang Zhinkir ɓang gha ku tu̱k.”

²⁵ Ɗyina shi ma ku̱ nyel ɗyi nu̱ke a nje bu̱laran mbu̱ Woparku ɓaanda za, “Wa zhangndi nga gha ku su̱ si ɓa.”

²⁶ “Ngga sa Nu̱ shaatarang nu̱ ɗa viki she Zhinkirang tu̱ ɗa ɓa she nu. Jiimbi shakhshakhndi nu̱ zhire na viki she Maghamang chin ka saidaki nga.

²⁷ Tun saidu ɓang tu̱k, ku̱me tun a su̱yen ndu̱ nga gumapaali.”