Yibraniyeku 9 - Mewar Alqawarang

Ghaari ghai nu̱ mbu̱ Shekhɗekh nu̱ mbu̱ Larji

¹ Yang ɗo, alqawar nu̱ gumapaalyang bibiti ghaari ghai ɓaran a nje, ndu̱ maa ghaari ghai nu̱ mbu̱ larji.

² Wa mbu̱r shekhɗekh nu̱ke mbanang shakhtan ku, shakhti mbu̱ kib nu̱ gumapaali ɗya maa nu̱ du̱ngki ɗye khubti pitila, ndu̱ tebu̱r, ndu̱ Ɓurti tolir nu̱ wakaki nu̱ gha. Yang ka qa maa nangang za Maa Shakhshakhndi.

³ Qu̱rse kapar nu̱ rap nu̱ shakki mbu̱ kalap zakandang nu̱gha kib nggur a nje nu̱ka qaki za Maa Nu̱ Dukki ndu̱ Shakhshakhi.

⁴ Ye maa nang du̱ku̱l a nje nu̱ ginarwa nu̱ka vaki ɗye zhi mu̱nkandi ɗyinan, ndu̱ Akwachi alqawarang. Mbu̱ Akwachi Alqawarang du̱ɓ nu̱ shiki ndu̱ ginarwe a nje ndu̱ manne mban, ndu̱ saaɓir ɓu̱ Kharuna nu̱ zhaki dlu̱mndi, ndu̱ ɗye bu̱larku wor rap nu̱ ndogdi nu̱ bu̱laki alqawarang nu̱ ɗyinan.

⁵ Viɗ ɗyine Akwachi Alqawarang cherobimku a nje nu̱ zhaaji ɓu̱ Magham, wa lu̱pa maa nu̱ka daki kuɗar solar ɓarang. Yang leendang chem ɓu̱ ɗu̱ma ɓalar maɗyikandi ɗyine ɗyiku nang ɓa.

⁶ Qu̱rse wa daasa aa nu̱m nu̱gha wanang, tu̱ kuruku ki viri nu̱ mbu̱ kib nu̱ gumapaali mbu̱ shekhɗekhang, a tlu̱nar kuru ɓaanda ku aa nyi ɗaatlimaa.

⁷ Yang gorkir ɓu̱ kuruku ɗyenda ka viki nu̱ mbu̱ kib nu̱ mbwang, yang ka vi sar kaada mbu̱ sonyi. Yang nu̱ka vi ɓa kope ndu̱ tom nu̱ke a ma vu̱rtan ku̱me solarku ɓaran, kom ndu̱ solarku ɓu̱ nduki nu̱ shiki ku waare zu̱ndi ɓaanda.

⁸ Nang Jiimbi shakhshakhndi a wutan za njiv viri nu̱ mbu̱ Maa Nu̱ Dukki ndu̱ shakhshakhi nu̱ zhirekandi nu̱ vi ye dalang dong ɓa ma nu̱ke maa ghaari ghai nu̱ gumapaalyang a nje chingndan.

⁹ Ɗyinang a wutkya ɗyi nggur yerem meeni. Vu̱rtiku ndu̱ sadkeku nu̱ka vu̱rki ku ɓu̱ ɗu̱ma shiɓ memu̱na nduki nu̱ke a ghar ghai nang nu̱gha tu̱ kha waare sola ku ɓa.

¹⁰ Yang ɗyiku nang ɗya ɓalar zu̱mndi ndu̱ zari, ndu̱ shibtiku zum zum. Ɗyiku nang ɗya bibitiku ɓu̱ nduku nu̱ shiki me ku̱ sarchi ɓu̱ mewar ɗyiku a ɓa.

Tom ɓu̱ Masiya

¹¹ Masiya ɗya gorkir ɓu̱ kuruku, nu̱ ɗa ɓa ki ndu̱ ɗyiku mbarkandi nu̱ke a nje khaarem leendang. Wa vi nu̱ mbu̱ shekhɗekh nu̱ dukki ndu̱ gwaari, tu̱ duk ndu̱ mbaari tu̱k, yang ɗya nduk shiki ɓa, ku̱me a mbu̱ du̱ngndi nang ɓa.

¹² Vi nu̱ mbu̱ Maa Nu̱ Dukki ndu̱ Shakhshakhndi nang sar kaada ye kharki. Nu̱ vi ndu̱ tom ɓu̱ gunoku ɓa yang tom ɓu̱ ye dleeku ɓa. Vikya ndu̱ tom ɓaran, nu̱ ɗa gwaki ɗanar yerem koɗokhsi ɓa.

¹³ Mbu̱ tom ɓu̱ gunoku, ndu̱ ɓu̱ dleeku, ndu̱ pu̱zhiti ɓu̱ ye dle nu̱ batlki wa ka gaɓ ndu̱ nu̱ ru̱gnar ku tu̱ var wor kha shakhshakh wa nu̱ me ghayan zu̱ki,

¹⁴ yang tom ɓu̱ Masiya ɗa? Chin nu̱ke beeko ve nda ɓa, nu̱ vu̱rki ɗyinan ye Magham nu̱ ku̱nshe Jiimbi nu̱ke koɗokhsi ɓa. Ai, shiɓ memu̱narem nu̱gha chem njig konyiku ɓu̱ memu̱narem nu̱ke boota su̱ ɓa nu̱ka daki rem ye mu̱ti, ma ku̱ gharmi ghai ye Maghamndi nu̱ nyifiri.

Mewar Alqawarang wa Nyel nu̱ ku̱nshe Mu̱ti ɓu̱ Yesu

¹⁵ Ku̱me nang Masiya khaki ma nu̱ chingndi nu̱ chele ɓu̱ mewar alqawar ɓu̱ Magham ndu̱ nduki, ma ku̱ nduki nu̱ qaki wor dlu̱ ɗye mbu̱ ge nu̱ke woɗa su̱ ɓa nu̱ Magham shiki alqawaran. Ɗyi nang kha wanang ku̱me mu̱ti wa shi nu̱ka lawaki nduki ɓar mbe solarku nu̱ shiki sarchi alqawar nu̱ gumapaalyang.

¹⁶ Mbu̱ njif nggur wa shi alqawar nggur ɗyine shakhti ɗye mbu̱ ge ɓaran me ku̱ mu̱ɗi, wa ku̱s ku̱ nduk zu̱n za shwat njif nu̱ shiki alqawar nang wa mu̱t dong kom tu̱ shi boote ndu̱ ɗyi nu̱ alqawarang zu̱ki.

¹⁷ Ku̱me alqawar shakhti ɗye mbu̱ ge ɓu̱ kha ndu̱ zalala ɓa kope qu̱rse mu̱ti ɓu̱ nu̱ zhin, nang a wutan za alqawarang ɓu̱ shi tlu̱na ɓa mbu̱ njif nu̱ shikyang a nje ndu̱ nyifiri.

¹⁸ Nang ke ɗyi nu̱ saki alqawar nu̱ gumapaali nu̱ kha ndu̱ zalala ɓa kope nu̱ mbu̱ɗki tom gha.

¹⁹ Qu̱rse Musa wa zu̱ ɗyi nu̱ke a mbu̱ bibitang ye ndukyang kap, tu̱ da tom ɓu̱ ye dleeku ndu̱ gunoku, tu̱ longga ndu̱ ɗyimi. Kom tu̱ da ndoɗyir khisop su̱yen ndu̱ wulu vyangndi tu̱ batl tomang nu̱ ɗyin lagarkati Bibitang ndu̱ ɗyine ndukyang kap.

²⁰ Tu̱ zu̱ za, “Nang ke tom alqawar nu̱ Magham zu̱ki ye nu za ku̱ khutlo nu.”

²¹ Tu̱ batl tomang nu̱ ɗyine shekhɗekhang, kom ndu̱ ɗyiku nu̱ka shiki tlu̱nar si.

²² Bibitang wa wut za aa nu̱m ka kha shakhshakh mbu̱ wa shiɓ nu̱gha ndu̱ tom. Yang yaapar sola nje waare mbu̱ti tom ɓa.

²³ Wa ku̱s ku̱ me ghayan kha wanang ma ku̱ ɗyiku nu̱ larji nang nu̱ke a wut jiimbi ɗyin viɗi kha shakhshakh. Yang ɗyiku nu̱ viɗi nu̱ vaanda a shimkya sadke nu̱ dukki nu̱ gumang mbaari.

²⁴ Jiwa Masiya nu̱ vikya nu̱ mbu̱ Kib shakhshakhndi nu̱ nduk du̱nki ɓa, ɗya ba zhire shipar ɓu̱ nu̱ viɗang. Masiya vikya nu̱ mbu̱ viɗi, ma ku̱ ɗu̱ nji gume Magham ku̱me chem.

²⁵ Yang vi nu̱ mbu̱ viɗang ma ki nji vu̱r ɗyinan aakochi, wa nu̱ke gorkir ɓu̱ kuruku ka viki nu̱ mbu̱ Kib Nu̱ Dukki ndu̱ Shakhshakhang, aa nyi sonyi ndu̱ tom nu̱ke ɗya ɓaran ɓaandang ɓa.

²⁶ Mbu̱ tu̱ga ka shi wanang, ai, tu̱ga Yesu ka ki za bonye aakochi, ma nu̱ du̱ngki larji. Yang wonji a ɓa ba sar kaada mbu̱ lauɗar su̱ qaandiku nang ma ku̱ da nji solarku ɓara nu̱ vu̱rki ɗyinan ku̱men.

²⁷ Ba wa nu̱ du̱nki ye aa nyi nduku ku̱ mu̱t sar da, qu̱rsan tu̱ Magham kuma nda,

²⁸ wanang tu̱k wa vu̱r Masiya sar kaada ma ku̱ da solarku ɓu̱ nduki khang. Masiya ka ɗa ɓa nu̱ rapan, yang ka ɗa ɓakya ma da solarku ɓu̱ nduki ɓa, ka ɗa ɓakya ma ɗana nduki nu̱ke a kasha gaɓti ɓaran.