Yibraniyeku 8 - Mewar Alqawarang

Yesu ke Kuru ɓu̱ Mewar Alqawarang

¹ Kap ɗyi nu̱ke chem a zu̱ran nang chin ke gorkir kuru a nje khaarem nu̱ke a nje kharan bu̱n zu̱ma ɓu̱ zhakhɗye kwaaɗar ɓu̱ Nu̱ Gorkirang far viɗi.

² Chin gorkir kuru nang a tlu̱nar ɓaran mbu̱ Kib shakhshakhndang, nang ke zhire ye maa nu̱ke Magham a si yang Magham ndu̱ ɗyinan saki, ɗya nduk ɓa.

³ Ka dat gorkir kuru ma vu̱r vu̱rtiku ndu̱ sadkeku. Wanang tu̱k wa shipa ku̱ gorkir ɓu̱ kuruku ɓaarem nang kha ndu̱ ɗyi nu̱ke chin ka vu̱rki.

⁴ Mbu̱ a nje mbu̱ larji nang tu̱ga nu̱ kha ma kuru sar da ɓa, ku̱me kuruku a nje zhu nu̱ke a zoɓa vu̱rtiku wa nu̱ Bibitang zu̱ki.

⁵ Yang kuruku nang ka shi tlu̱nar ɓaanda mbu̱ Kib shakhshakhndi nu̱ke chin ke shipar jiimbi nu̱ke a viɗi. Ku̱me sarchi nu̱ke Musa a ma za shekhɗekh nu̱ke Magham ka khaki mban nang, wa wu nda za, “To shi aa nu̱m tu̱ kha ba wa shipar nu̱ wutki yor ɗyin dlengang.”

⁶ Yang leendang wa vu̱r tlu̱nar kuru nu̱ dukki ɓaanda mbaari ye Yesu, ba nu̱ke alqawar nu̱ Yesu chingki nu̱ chele ɓu̱ Magham ndu̱ nduki. Alqawar taɗakandi nang wa duk mbaari ku̱me shir nda nu̱ ɗyine alqawar mbarkandi.

⁷ Mbu̱ tu̱ga alqawar nu̱ gumapaalyang nu̱ kha tu̱ɓtan ɓa, ai, tu̱ga nu̱ shi nggur zum qu̱rse nang ɓa.

⁸ Yang Magham wa na zop ɓu̱ nduki ɓaran nu̱ zu̱ki za, “Nga zu̱ran ye nu, sarchi a nje a ɓari, nu̱ke ngga daasaki alqawar mewakandi ndu̱ nduki Israila ndu̱ Yakhuda.

⁹ Nang ɓu̱ kha wa alqawar nang shiki ndu̱ zhikankirku ɓaanda, sarchi nang khubki khar wor tang dut wor ɓar mbu̱ ghai Masar ɓa. Ku̱me nu̱ mbu ɗyi nu̱ alqawar ɓang zu̱ki ɓa, tang vi ɓar mbu̱ njiv ɓaanda, nga Zhinkir gwaanji kya ɓalar nang.

¹⁰ Wonji alqawar nu̱ke nga ma shiran ndu̱ nduki nu̱ Israila mbu̱ qaandiku nu̱ke a ɓari, nga Zhinkir gwaanji kya ɓalar nang. Ngga sa bibitiku ɓang nu̱ mbu̱ kwaari ɓaanda, ngga bu̱lan mbu̱ memu̱na wora. Ngga kha ma Maghamndi ɓaanda, tu̱ kha ma nduki ɓang ku.

¹¹ Gana nduk ɓu̱ shoga ye nu̱ bing ɓaran tu̱k ɓa, yang nduk ɓu̱ shoga ye khachin tu̱k za, ‘Zu̱n Zhinkir gwaanji ɓa.’ Ku̱me ka zu̱ndi nga ku kap ɓaanda, ji ɗyin nduki nu̱ dukki koɗomme chele ɓaanda ma yir ɗyin nduki nu̱ dukki gwaari.

¹² Jiwa ngga ndu̱m ɗyoti mbi ɓaanda ye wora, ngam ɓu̱ kor solarku ɓaanda tu̱k sar da ɓa.”

¹³ Nu̱ ku̱nshe qar alqawarang, “Mewakandang” wa gaɓ ndu̱ nu̱ gumapaalyang tu̱ kha gu̱maran ɗo. Yang tu̱k ɗyin zhu, nu̱ gu̱maki tu̱k, ka su̱ya ɓu̱ shoɓ ɓa.