Yibraniyeku 7 - Mewar Alqawarang

Melkizedek Kuru gwaanji

¹ Jiwa Melkizedek wa shi kuji Salem, ndu̱ kuru ɓu̱ Maghamndi nu̱ dukki aaki zhaaji. Gama ndu̱ Yibram sarchi nu̱ Yibram a gaɓki qu̱rse wa zu̱m loobo ɗyine kujiku nggur nu̱ shiki dakhlar ndu̱ wora. Nu̱ Yibram gamaki ndu̱ Melkizedek, tu̱ Melkizedek sa barke yenda,

² Tu̱ Yibram vu̱r zake ɓu̱ aa nu̱m yenda. Gumapaali, dlu̱m Melkizedekang mban za “Kuji Dambu.” Kom ndu̱ kuji Salem tu̱k, mban za, “Kuji Qaandi Memu̱na.”

³ Yang Melkizedek zhinki kha nda ɓa manki kha nda ɓa, yang nu̱ nduk zu̱n dlu̱dlarsan zum ɓa. Fu̱ɗar nu̱ khaki nda nje ɓa yang fu̱ɗar mu̱ti ɓaran a nje ɓa. Wa nu̱ke Yi ɓu̱ Magham ɗya kuru nu̱ke koɗokh venda ɓa, wanang tu̱k Melkizedek ɗya kuru nu̱ke koɗokh venda zum ɓa.

⁴ Nggu̱t ma gwaari ɓu̱ njif nang ka. Tu̱ Yibram zhikan zhikanerem vu̱r zake ɗyiku nu̱ ɗa lawaki ɓar mbu̱ dakhlarang yenda.

⁵ Leendang Bibitang a shim nduki nu̱ me sham ɓu̱ Lawi nu̱ke ɗya kuruku ku̱ dlu̱ zake she ndukiku, wor ke nyeezi wora, aa nu̱ke kap ɓaanda ɗya qusonggi ɓu̱ Yibram ku.

⁶ Yang ɓu̱ Melkizedek, aa nu̱ke nu̱ kha da ndu̱ wor ɓa, tu̱ dlu̱ zake kha Yibram, tu̱ sa barke ye chin Yibram nu̱ Magham shiki alqawarang yenda.

⁷ Njif nu̱ saki barke ye nduk wa duk nu̱ dlu̱r barkyang gwaari shwat.

⁸ Wonji aa kuruku na viki me sham ɓu̱ Lawi, aa nu̱ke wa ka mu̱t ku wa ka dlu̱ zake kha nduki. Yang ɓu̱ Melkizedek, nu̱ dlu̱ki zake kha Yibram a nje ndu̱ nyifiri ba wa nu̱ zu̱ki nu̱ ɗyine nda.

⁹ Nduk ka ɗu̱ma zu̱ran za Lawi ndu̱ ɗyinan, nu̱ ka dlu̱ki zakyang wa vu̱r zake ɓaran nu̱ ku̱nshe Yibram.

¹⁰ Nduk ka zu̱ wanangang ku̱me sarchi nu̱ Yibram gamaki ndu̱ Melkizedek nu̱ kha Lawi dong ɓa, ku̱me a nje mbe zhikan.

Yesu wa Melkizedek

¹¹ Mbu̱ tu̱ga nduk ka kha nyeedlan ku̱me khar ɓaran ma kuru nu̱ me sham ɓu̱ Lawi (ma nu̱ke a vu̱r bibitang ye ndukyang ku̱men). Nu̱m saki ma ku̱ kuru nggur a ɓa chin na ɓa ki mbu̱ dulbu ɓu̱ Melkizedek nu̱ khaki zum ndu̱ ɓu̱ Kharuna na?

¹² Ku̱me mbu̱ wa paata me ghai ɓu̱ kuruku, wa ku̱s tu̱k ku̱ paata bibitang nu̱gha.

¹³ Chin njif nu̱ke chem a ɓalar ɓaran nang, a vi me sham nggur zum. Aa da nduk a nje me sham ɓaanda nu̱ khaki ma kuru tu̱ shi tlu̱nar ɓu̱ kuruku ɗyin du̱ku̱lang ɓa.

¹⁴ Zhinerem gwaanji a vi me sham ɓu̱ Yakhuda shwat, yang nu̱ Musa shi ɓalar ɓu̱ me sham nang sarchi nu̱ke a ɓalar ɓu̱ kurukwang ɓa.

¹⁵ Ɓalar nang a vi ye dalang maɗyi sarchi nu̱ kuru nggur zum a viki, nu̱ khaki wa Melkizedek.

¹⁶ Yang kuru nang nu̱ ɗa ɓa nu̱ ku̱nshe mburi me ghai tom me sham ɓa, a ɓa nu̱ ku̱nshe zalale nyifi nu̱ke nu̱ka shi su̱ya ɓa.

¹⁷ Ku̱me wa saida nda za, “To kuru nu̱ke lauɗarsi su̱ ɓa, mbe shipar ɓu̱ Melkizedek.”

¹⁸ Wa du̱ng Bibiti nu̱ zhu nu̱ konggol, ku̱me zalale nu̱ kata yang boota su̱ ɓa.

¹⁹ (Jiwa bibitang ɓu̱ ɗu̱ma sa ɗyi nggur tu̱ kha nyeedlan ɓa). Nang ke ɗyi nu̱ saki tu̱ daasa ɗyi nu̱ dukki mbaari nu̱ke chem ka saki memu̱na rem nu̱ ɗyinan ma ku̱ song mi nu̱ bing ndu̱ Magham.

²⁰ Yang nu̱ shi waare ku̱mnda ɓa! Ɓeenan kha ma kuru waare ku̱mnda.

²¹ Yang ɓaran kha ma kurwang su̱yen ndu̱ ku̱mndar nu̱ Magham shiki za, “Zhinkir gwaanji wa woɗa ku̱mndari, yang ɓu̱ nggoɗ ɓalar ɓaran ɓa, ‘To kuru nu̱ke nu̱ka shi lauɗa ɓa.’ ”

²² Yesu wa kha ma nu̱ wuti alqawar nu̱ dukki mbaari nu̱ ku̱nshe ku̱mndar nang shwat.

²³ Kuruku nu̱ zhu wa shi khang ku ku̱me mu̱ti wa nggu̱tl wor zu̱mndi guma ndu̱ tlu̱narku ɓaanda.

²⁴ Yang ɓu̱ Yesu wa kha ma kuru nu̱ke lauɗarsi ve nda ɓa, ku̱me a nje ndu̱ nyifiri ɓu̱ mu̱t tu̱k ɓa.

²⁵ Ku̱me nang ka ɗu̱ma ɗana nduki nu̱ ɗa ɓa ki she Magham nu̱ ku̱nshe nda aakochi, ku̱me a nje ndu̱ nyifiri laada su̱ ɓa, a zu̱m guma ndu̱ khuti Magham ku̱me wora.

²⁶ Chem a gangkya pooni gorkir kuru nang. Chin shakhshakh, waare zop, shibtan, wa wakanda nu̱ konggol tu̱ njig nu̱ solarku, tu̱ da nda nu̱ viɗi ɗyine aa nu̱m kap.

²⁷ Nu̱ kha wa gorkir kuruku naandangang ɓa. Nu̱ ka vu̱r dlu sadke aa nyi ɗatli ma da da ɓa, ku̱me nu̱ka vu̱r sadkyang ku̱me solar ɓaran kom tu̱ vu̱r ku̱me solar ɓu̱ nduki ɓa. Vu̱r sadke ɓaran sar kaada ye kharki, sarchi nu̱ vu̱rki ɗyinan.

²⁸ Jiwa bibitang ka datkya gorkir kuruku chele ɓu̱ nduki nu̱ka tu̱ɓki. Yang ku̱mndar na ɓa ki qu̱rse Bibitang, datki Yi ɓaran nu̱ khaki nyeedlan koɗokhsi ɓa.