Yibraniyeku 6 - Mewar Alqawarang

¹ Ku̱me nang, gang mi gha ɗyin shogar pichichindi nyem dlu̱ki nu̱ gumapaali ɗyine Masiya ɓa, yang zu̱m mi guma chem gori. Ku̱ kha mi chem a shogakya shogar maitar Magham, ndu̱ nu̱ nggooti njigti tlu̱narku nu̱ke ka ɗu̱ki ndu̱ chem mbe mu̱ti ɓa.

² Kom ndu̱ shogar ɗyine baptisme, ndu̱ nu̱ sar khar barke, ndu̱ nu̱ jiiri ɓu̱ mu̱tiku, ndu̱ kumar fu̱ɗar wuri.

³ Chem ka zu̱mkya guma mbu̱ Magham wa tlogha san yerem.

⁴ Jiwa ka shi shar ku̱ nduki nu̱ gwaki yarang ɓalar ɓu̱ Magham, ndu̱ nduki nu̱ darki vu̱rti ɓu̱ Magham nu̱ mbu̱ viɗi, ndu̱ nduki nu̱ gwaki me ɓaanda mbe Jiimbi shakhshakhndi.

⁵ Kom ndu̱ nduki nu̱ darki mu̱ndi ɓu̱ ɓalar ɓu̱ Magham ndu̱ zalale nu̱ke a ɓar fu̱ɗar wuri.

⁶ Mbu wa gaɓ nu̱ gana ku mbe maito ɓaanda ku̱ nggoɗ ku ku̱me khar asar ɓaanda a kalkya Yi ɓu̱ Magham nu̱ gha ku tu̱k zum, a wut kawar yenda gume nduki ye dalangi.

⁷ Maa vu̱ghai nu̱ke a gwa romndi aakochi, wa ka ɓana kaɓtiku zum zum nu̱ke nu̱ ghutan ku ka gwaki boote ni, maa nang ɗya maa nu̱ gwaki barke ɓu̱ Magham.

⁸ Mbu̱ yang maa nang a ɓanakya njekhti ndu̱ wuzu̱ndi ku malkandi, ɓu̱ kha ndu̱ boota ɓa. Maa nang Magham wa shi bing mi barke ɓaran. Ye lauɗar san ka ɓa va nda nu̱ gha.

⁹ Raptaku, aa nu̱ke chem a pooni ɓalar nang, chem wa maita nu̱ ɗyine ɓaanu tun wa dlu̱ barke nu̱ dukki mbaari qu̱rse ɗanar ɓaanu.

¹⁰ Magham ɗya nu̱ song shir zhire ɓa. Ɓu̱ mona tlu̱narku nun shiki nu̱ ndolar nun wutki yenda sarchi nu̱ke tun a shaata nu̱ mbu Yesu ku ɓa, ba wa nu̱ke tun a ɗyin shiran ma ɓar meeni.

¹¹ Chem a shim ku̱ aaki zu̱m guma ndu̱ shiran wanang ma yir ve lauɗar san, ma ku̱ nyel nu ɗyi nun saki memu̱na nu nu̱ ɗyinanang.

¹² Nyem shim kha nu ma tu̱sku̱n ɓa, yang mbu ma ɗyin sari wor nu̱ke nu̱ ku̱nshe maito ndu̱ kanaɗyi tu̱ dlu̱ ɗye alqawar nu̱ Magham shiki ye wora.

Zhire Alqawar ɓu̱ Magham

¹³ Ye sarchi nu̱ Magham shiki alqawar ye Yibram, shi alqawar nang nu̱ ku̱mndari. Yang ku̱mnda ndu̱ dlu̱man nu̱ke tun a nje nu̱ dukki nda gwaari nu̱ke ka ku̱mndaki su̱ ɓa.

¹⁴ Magham wa zu̱ za, “Ngga sa barke yor shwat, ngga sa tu̱ qusonggi ɓaa shi khang maɗyi.”

¹⁵ Qu̱rse Yibram wa gu̱n memu̱naran ndu̱ kaɗanyi maɗyi, wa dlu̱ ɗyi nu̱ shiki alqawaran yendang.

¹⁶ Nduk ka ku̱mnda ndu̱ njif nu̱ dukki nda gwaari. Ku̱mndarang ka sa tu̱ alqawarang kha zhire keele su̱ ɓa.

¹⁷ Wanang tu̱k, nu̱ Magham shimki ku̱ wut nji ye nduki nu̱ke a ma zu̱m ɗye mbu̱ ge alqawarang nu̱ ɗyine, shwat ɗyi nyin daki ye memu̱naran ɓu̱ shi paata ɓa. Wut zhire ɓu̱ alqawar nang nu̱ ku̱nshe ku̱mndar nu̱ shiki.

¹⁸ Yang ɗo, ɗyiku a nje rap nu̱ke nu̱ka shi paata ɓa, yang ɓu̱ shi tu̱ Magham shi song zhire ɗyinan ɓa. Nu̱ke ɗyinang ɗya ɗye par du̱mbu̱r ye memu̱narem maɗyi, chem nyem ɗaki ku̱me gwami chem khuɓ maitwang, chem ka gwa par du̱mbu̱r maɗyi.

¹⁹ Chin sar memu̱nar ɓaarem nang saki chem ching gha shaanggu̱ɗang waare sawa. Yesu viki nu̱ mbu mbu maɗyi, tu̱ ɗu̱ qu̱rse kapar nu̱ke a mbu̱ rafti ɓu̱ Magham nu̱ke a viɗang me ɓaarem.

²⁰ Yesu nu̱ kayaki rem viri nu̱ ve maa nang, vi ku̱me chem, tu̱ kha ma gorkir ɓu̱ kuruku nu̱ke lauɗa si su̱ ɓa, mbu̱ dulbu ɓu̱ Melkizedek.