Yibraniyeku 5 - Mewar Alqawarang

¹ Ka dat aa nyi gorkir ɓu̱ kuru ku chele ɓu̱ khuzuku ma ku̱ shi tlu̱nar ye ɓeeni nduki, chin ka chingki me ɓaanda ɗyine ɗyiku nu̱ke ɓu̱ Magham. Chin ke nu̱ vu̱r vu̱rtiku ndu̱ dlar sadkeku ku̱me solarku.

² Ka ɗu̱ma taata nduki nu̱ song zu̱ndi ndu̱ nduki nu̱ nggaki njiva gha, ma nu̱ke chin ndu̱ ɗyinan tu̱ɓtan.

³ Tu̱ɓti ɓaranang, saki tu̱ ku̱s ku̱ vu̱r sadke nu̱ dlaki nu̱ gha, ku̱me solar ɓu̱ nduki ɗyenda ɓa, yang ku̱me solarku ɓaran tu̱k.

⁴ Nduk a nje nu̱ke ka datki tlu̱nar nu̱ zhaaji nang ye ɗyinan ɓa. Wa ku̱s ku̱ Magham qa nda, ba wa nu̱ qaki Kharuna.

⁵ Wanang tu̱k Masiya nu̱ da varan ma ku̱ kha nji ma gorkir ɓu̱ kuruku ɓa. Me ɓu̱ nang, Magham wa ze nda za, “To Yi ɓanga, nga kha ma Zhu meeni.”

⁶ Tu̱ gaɓ tu̱ shi ɓalar ye maa nggur za, “To kuru nu̱ke lauɗarsi ve ɓa, wa nu̱ke dulbu ɓu̱ Melkizedek wutki.”

⁷ Sarchi nu̱ke Yesu a mbu̱ larji, wa shi bararku ndu̱ khutiku ndu̱ ghoori ndu̱ ɗyim ghoori maɗyikandi. Wa shi bararku ɓaran ye Magham nu̱ke ka ɗu̱maki lawa nda ɓar mbe mu̱ti. Ku̱me ɗya nu̱ vu̱rti gorki mbe sawar Magham, tu̱ Magham tlogha su̱ barar ɓaran.

⁸ Aa nu̱ke Yesu ɗya Yi ɓu̱ Magham, wa shoga mburi su̱qur mbe bonye nu̱ zaki.

⁹ Ma nu̱ khaki nyeedlan, tu̱ kha ma dlu̱dlarsi ɗanar nu̱ke woɗa su̱ ɓa ye nduki nu̱ke a mbu su̱quran kap.

¹⁰ Kha wanang ku̱me Magham daati nda tu̱ kha ma gorkir ɓu̱ kuruku wa nu̱ dulbu ɓu̱ Melkizedek wutki.

Wuri ɗyine gaɓti nu̱ Gana

¹¹ Ɗyiku a nje khang nyem shimki ku̱ zu̱ mi ye nu ɗyine ɗyiku nang, yang ka shi shar ku̱ zu̱ mi ye nu, ku̱me nun ka da mbu̱ tun ɗau ɓa.

¹² Leendang shipa tu̱ga tun ka shogaki ɓar ye nduki, yang ma ɓar meeni tun a shim ku̱ njif nggur maata shogarku ndolndolndi nu̱ ɓalar ɓu̱ Magham ye nu. Nun khu̱l ma zu̱m ɗye zu̱mndi kaaku̱ɗakhndi ɓa, tun a zakya ɓiɓi ɗyenda!

¹³ Njif nu̱ke ɓiɓi ke ɗye zu̱mndi ɓaran ɗya ɓeela, nu̱ zu̱n aa nu̱m ɗyine shogar dambi ɓa.

¹⁴ Yang ɗye zu̱mndi kaaku̱ɗakhndi ɗya ɓu̱ nduki nu̱ gorki. Poonan ke nduki nu̱ka shiki boote ndu̱ kwaari ɓaanda aakochi, tu̱ ka shakh chele ɓu̱ ɗyi mbarkandi ndu̱ ɗyi malkandi.