Yibraniyeku 4 - Mewar Alqawarang

Fu̱ɗar Maasi ku̱me Nduki ɓu̱ Magham

¹ Nu̱ke alqawar viri nu̱ mbu̱ maasi ɓaran a nje ma ɓar leendang, chem ku̱r vaarem maɗyi ɗo ma ku̱ njif nggur ku̱na gwa viri nu̱ mban ɓa.

² Jiwa chem wa woɗa tu̱k Labar Mbarkandang ba wa nu̱ tu̱kki ku. Yang Labar mbarkandi nu̱ tu̱kki kwang nu̱ boota wor sar da ɓa, ku̱me nu̱ dlu̱ ku su̱yen ndu̱ maito ɓa.

³ Yang chem nyem maitaki, chem ka viki nu̱ mbu̱ maasi nang. Chem a kor ɓalar ɓu̱ Magham nu̱ zu̱ki za, “Nga shi shokhna tang ku̱mnda nga za, ‘Ɓu̱ vi nu̱ mbu̱ maasi ɓang ku sar da ɓa.’ ” Magham zu̱ wanang aa nu̱ke wa woɗa tlu̱nar ɓaran ye sarchi nu̱ du̱ngki larji.

⁴ Jiwa wa shi ɓalar ɓu̱ fu̱ɗar nu̱ mut ye maa ngguri nu̱ zu̱ki za, “Ye fu̱ɗar nu̱ mut tu̱ Magham mas ndu̱ tlu̱nar ɓaran kap.”

⁵ Yang wa gaɓ tu̱ maata ɓalar nang rong ma kaani tu̱ zu̱ za, “Ɓu̱ vi ku nu̱ mbu̱ maasi ɓang sar da ɓa.”

⁶ Yang zalale a nje leendang ye nduki ma ku̱ gwa maasang ku. Nduki nu̱ tu̱kki Labar mbarkandi nu̱ ɓalar maasi nang zhu nu̱ gwa maasi kwa ɓa, ku̱me nu̱ maita ɓalarang ku ɓa.

⁷ Magham wa daasa fu̱ɗar nggur nu̱ qaki za, “Meeni”. Wa shi ɓalar ɓu̱ fu̱ɗar nang nu̱ ku̱nshe Dauda, ba wa nu̱ bu̱lar Ɓalar ɓu̱ Magham zu̱ki zhu za. “Meeni mbu̱ tun wa tu̱k su̱qur Magham, ku̱ shi nu̱ kaaku̱ɗakh memu̱na ɓa.”

⁸ Mbu̱ tu̱ga Joshuwa wa vu̱r maasi ye nduki ɓu̱ Magham, tu̱ga Magham nu̱ shi ɓalar Fu̱ɗar maasi nggur zum tu̱k ɓa.

⁹ Nang a wutan za maasi ye qaandi nu̱ mu̱t nggur a nje ku̱me nduki ɓu̱ Magham.

¹⁰ Jiwa kap njif nu̱ viki nu̱ mbu̱ maasi ɓu̱ Magham ka ɓa mas ndu̱ tlu̱nar ɓaran ba wa nu̱ Magham maski ndu̱ ɓaran.

¹¹ Ku̱me nang, shi mi ɗyi nu̱ke chem ka shiki kap ma vi mi nu̱ mbu̱ maasi nang. Ku̱ aaki ku̱na viri nu̱ mban wa nu̱ ku̱naki ku ku̱me zhangndi tu̱kti maa ɓa.

¹² Ɓalar ɓu̱ Magham nyifi si yang a tlu̱na shwat, me nang nyamnyam wa duk aa nyi kaskar nu̱ke men rap. Wa ka vi nu̱ mbe nduku, tu̱ mber chele ɓu̱ jiimbi nduku ndu̱ nyifiri ɓaran, tu̱ vi chele ɓu̱ mebarku ndu̱ ɓolgo. Wa ka kuma kwaari ɓu̱ nduku ndu̱ ɗyi nu̱ ku̱rki mbu̱ memu̱naran.

¹³ Tun a nje mbu̱ du̱ngdiku ɓu̱ Magham nu̱ke tukaran she nda ɓa. Aa nu̱m ndu̱ aa nu̱m qu̱ndan, a ye dalangi, a naran. Chem ka shiga su̱ ɗyi nyem shiki mbu̱ khar viti ɓaarem yenda.

Yesu ke Gorkir Kuru gwaanji

¹⁴ Yang ɗo, nu̱ke gorkir kuru gwaanji a nje khaarem, chin ke Yesu Yi ɓu̱ Magham chin nu̱ ɗu̱ki mbu̱ viɗi gume Magham, khuɓ mi maito ɓaarem nu̱ gha ɓang ɓang.

¹⁵ Jiwa chin gorkir kuru ɓaaremang ɗya njif nu̱ damtaki ndu̱ tu̱ɓti ɓaarem. Ku̱me wa gwa buuriku ve aa nyi njiv nu̱ buuki rem, yang nu̱ shi sola ɓa.

¹⁶ Ku̱me nang, ku̱ kha mi ndu̱ shokhku̱rokh memu̱na. Chem a song nu̱ bing ndu̱ zhakhɗye mu̱nkir nu̱ kwaaɗar ɓu̱ Magham ma ku̱ na zhiyaye ɓaarem. Chem gwa mu̱nkir, nu̱ke ka shaataki rem mbu̱ sarchi nu̱ke chem a gang tunu.