Yibraniyeku 3 - Mewar Alqawarang

Yesu wa Duk Musa ndu̱ Zhaaji

¹ Ku̱me nang nyeezaku wakakandi, nun gwaki qar viɗi she Magham tu̱k, shi ma kwaari ɗyine Yesu chin nu̱ke ɗya puda ndu̱ Kuru gwaanji ɓu̱ maito nu̱ke chem a saidaran nang.

² Yesu wa shi zhire ye njif nu̱ datki nda, ba wa nu̱ Musa shiki zhire mbe tlu̱nar ɓaran mbu̱ tabar nduki ɓu̱ Magham.

³ Njif nu̱ du̱nki rafti wa duk raftang nu̱ zhaaji. Wanang tu̱k Yesu wa duk Musa zhaaji ɓakh maɗyi.

⁴ Jiwa aa nyi rafa nu̱ du̱ndan a nje, yang Magham du̱nki aa nu̱m.

⁵ Musa wa shi zhire mbe tlu̱nar ɓaran ye khar ɓaran maava chele nduki ɓu̱ Magham, wa shi ɓalar ɗyine ɗyi nu̱ke Magham a ma zu̱ran gana fan.

⁶ Yang Masiya ɗya nu̱ zhire mbe khar ɓaran Yi ɓu̱ Magham ɗyine nduki ɓu̱ Magham. Chem ke nduki ɓaran mbu̱ chem wa zu̱m guma ndu̱ shokhku̱rokh memu̱na, chem a sa memu̱narem su̱yen ndu̱ wakhti ɗyine ɗyiku nu̱ke chem a bu ɓar ɓaanda.

Wuri ɗyine Song Maito

⁷ Ku̱me nang, ba wa nu̱ Jiimbi shakhshakhndi zu̱ki, “Meeni mbu̱ tun wa tu̱k su̱qur Magham a ɓalari,

⁸ ku̱ shi nu kaaku̱ɗakh memu̱na wa nun shiki ye sarchi tonggu̱rong mbu̱ gaarang ɓa. Ba wa fu̱ɗar nu̱ buuki nga ku mbu̱ gaarang.

⁹ Wa taɓ memu̱nara tu̱ buuri nga ku fara, aa nu̱ke wa na tlu̱narku nang shiki me sonyi ɗyin vat.

¹⁰ Nang ke ɗyi nu̱ saki tang shi shokhnar ndu̱ ndukiku zaman naandang, tang zu̱ nga za, ‘A zhangndi nga gha ku mbu̱ memu̱na wor aakochi, nu̱ zu̱n njivku ɓang ɓa.’

¹¹ Tang shi shokhna tang ku̱mnda nga za, ‘Ɓu̱ vi nu̱ mbu̱ maasi ɓang ku sar da ɓa.’ ”

¹² Nyeezaku, shi ma ɗyi nu̱ke tun ka ɗu̱maki ma ku̱ njif nggur chele ɓaanu nu̱ke solar ndu̱ song maito nu̱ke a mbu̱ memu̱naran ka saki nda tu̱ njig Magham nu̱ nyifi ɓa.

¹³ Tun ki pa du̱mbu̱r ye yen aa nyi fu̱ɗa. Shi ma boote ndu̱ aa nyi sarchi nu̱ka qaki za “Meeni”, ma ku̱ aa da chele ɓaanu kha ndu̱ kaaku̱ɗakh memu̱na nu̱ ku̱nshe lambar ɓu̱ sola ɓa.

¹⁴ Jiwa chem nduk yen mbe Masiya mbu̱ chem wa khuɓ maito ɓaarem ndu̱ du̱mbu̱r ji ve nggarsan ma yir she lauɗar san.

¹⁵ Ba wa nu̱ zu̱ki za, “Mbu̱ tun wa tu̱k su̱qur Magham meeni, ku̱ shi nu kaaku̱ɗakh memu̱na wa nun shiki ye sarchi nun shiki tonggu̱rong ngang ɓa.”

¹⁶ Nu̱ ki tu̱kki su̱qur Magham, yang kap ndu̱ nang, tu̱ shi tonggu̱rong yenda kwang na? Ai, wor ke ba nduki nu̱ke Musa shiki dle gume ye wor ta vi ndu̱ wor ɓar mbu̱ ghai Masarang ɓa goma?

¹⁷ Magham shi shokhnarang ndu̱ nu̱ ki me sonyi ɗyinvat nda na? Ai, nang ke ba nduki nu̱ shiki solar ku, tu̱ nggu̱ɗ ku tu̱ mu̱ɗi mbu̱ gaarang ɓa goma?

¹⁸ Nu̱ ki Magham ku̱mndaki nu̱ ɗyine wor za, ɓu̱ vi ku nu̱ mbu̱ maasi ɓaran sar da ɓa ndang na? Ai, wor ke ba nduki nu̱ zhangki mbu zu̱r ɓaranang gha de?

¹⁹ Ku̱me nang chem wa na nu̱ ɗyine song maito saki nu̱ ɗu̱ma viri nu̱ mbu̱ maasi nang ku ɓa.