Yibraniyeku 2 - Mewar Alqawarang

Gwar Dlu̱mndi ye Ɓalar ɓu̱ Magham

¹ Ku̱me nang, wa ku̱s ku̱ sa mi khankal ɓaarem maɗyi nu̱ ɗyine ɗyiku nyem tu̱kki, ma ku̱ nduk duterem ɓar chem gal gha ve njiva ɓa.

² Yang mbu̱ke zoɓar ɓalar nu̱ zu̱ki yerem nu̱ ku̱nshe nu̱ ru̱ktiku ɓu̱ Magham, wa ku̱s ma ku̱ nduk mbu, yang aa nyi njif nu̱ zhangki tu̱ktan gha, ndu̱ nu̱ zhangki mburan gha, wa gwa kumar nu̱ shipaki.

³ Chem ka lawa kikimndana mbu̱ chem wa zhang ɗanar gwaanji nang gha? Ɗanar gwaanji nang Zhinkir gwaanji ndu̱ ɗyinan nggaki su̱ zu̱ran. Nduki nu̱ tu̱kki ɓalar ɓaranang wa wut yerem za shwat ɗya zhire.

⁴ Kom Magham wa shaata wut saidu ɓaran nu̱ ɗyine ɓaanda nu̱ shikyang, nu̱ ku̱nshe ɗye saiduku, ndu̱ ɗyiku nu̱ke nduk nu̱ su̱n nu̱ naran ɓa. Kom ndu̱ ɗye lazhamku zum zum, ndu̱ vu̱rtiku nu̱ shakki nu̱ ku̱nshe Jiimbi shakhshakhndi wa nu̱ shimki.

Njif nu̱ke ka Daki remi ma Viri nu̱ Zhena

⁵ Magham nu̱ sa fu̱ɗar wur nu̱ke a ɓar nu̱ke chem a ɓalaranang nu̱ mbu̱ bu̱n nu̱ ru̱ktiku ɓaran ɓa.

⁶ Me ɓu̱ nang tu̱ njif nggur saida mbu̱ bu̱lar Ɓalar ɓu̱ Magham ye maa nggur za, Ai Magham, “woɗye nduk ɗya nu̱m kwa no damtaki ndu̱ chinang, yi ɓu̱ nduk, nu̱ke ta ɗang ndang?

⁷ Ta shir nda tu̱ kata nu̱ ru̱ktiku ɓaaro, to shi zhar yenda ndu̱ zhaaji maɗyikandi no vu̱rki yenda ndu̱ gorkiri,

⁸ to sa aa nu̱m nu̱ mbu̱ bu̱nan.” Nu̱ Magham saki aa nu̱m nu̱ mbu̱ bu̱n nduku, tun a nje nu̱ke nu̱ vu̱r zalale ye nduk ɗyinan ɓa. Aa nu̱ke leendang, nyem na nduk a kwaaɗar ɗyine ɗyiku kap ɓa.

⁹ Chem nakya Yesu nu̱ saki tu̱ kata nu̱ ru̱ktiku ɓu̱ Magham me sarchi koɗomma. Yang leendang wa vu̱r zhaaji ndu̱ gorkir yenda ku̱me wa shi bonye nu̱ ku̱nshe mu̱nkir ɓu̱ Magham ka dar mu̱ɗi me ɓu̱ nduk kap.

¹⁰ Magham du̱ngki aa nu̱m, chin kya nggu̱t aa nu̱m tu̱k. Ku̱me nang, mbu̱ Magham a ma sa qusonggi ɓaran khang ku̱ gwa zhaaji, ka sa tu̱ Yesu kha nyeedlan nu̱ ku̱nshe bonye nu̱ zaki.

¹¹ Jiwa chin nu̱ saki nduki tu̱ kha shakhshakh, ndu̱ wor nu̱ khaki shakhshakhang, zhin wor da. Nang ke ɗyi nu̱ saki Yesu nu̱ka tu̱k kawar zu̱ran za ɗya nyeezanku ɓa.

¹² Wa zu̱ ye Magham za, “Ngga wopa Dlu̱mor ye nyeeza, ngga khamdo ro mbu̱ tabar nduki.”

¹³ Wa zu̱ tu̱k za, “Ngga dla vara nu̱ ve Magham tu̱k.” Tu̱ gaɓ tu̱ zu̱ tu̱k za, “Wonji nga, su̱yen ndu̱ qusonggi nu̱ Magham vu̱rki ya.”

¹⁴ Yang nu̱ke qusonggi nang ɗya dlu ndu̱ tom, tu̱ kha wa wor tu̱k nu̱ daki man var nu̱ke ɗya dlu ndu̱ tom tu̱ kha man var wor wayen. Shi wanang ma ku̱ tlagha nji njif nu̱ke zalale mu̱ɗi a mbu̱ kharan, chin ke Sheɗan, nu̱ ku̱nshe mu̱ti ɓaran nu̱ shiki.

¹⁵ Wa kotl nduki ɓar kap, nang ke nduki nu̱ke sawar mu̱ti gu̱nki wor nu̱gha, tu̱ kha ma maava mbu̱ khar viti ɓaanda.

¹⁶ Shaatakya nu̱ ru̱ktiku ɓu̱ Magham shwat ɓa, shaatakya qusonggi ɓu̱ Yibram.

¹⁷ Nang ke ɗyi nu̱ saki tu̱ gaɓ ndu̱ chin tu̱ kha wa nyeezan ve aa nyi njiva. Ma ku̱ kha ma kuru gwaanji ɓu̱ Magham. Nu̱ shir zhire, nu̱ nar zhiyaye tu̱k mbu̱ tlu̱nar nu̱ke a shiran ye Magham. Ma ku̱ kha nji ma sadke nu̱ dlaki quran ma da shipiti taɗar solar ɓu̱ nduki ye ɗyinan.

¹⁸ Nu̱ke chin ndu̱ ɗyinan wa za bonye sarchi nu̱ buuki nda, ka ɗu̱ma shaata nduki nu̱ke a mbu̱ buuri.