Yibraniyeku 13 - Mewar Alqawarang

Ɗyiku nu̱ke Magham a Shimndan

¹ Zu̱m ma guma ndu̱ wuti ndolar khachinkir ye yen.

² Mona nu shir mu̱nki ye runggiku ɓa, ku̱me shir wanang saki tu̱ ɓeena nduki gaɗa nu̱ ru̱ktiku ɓu̱ Magham, nu̱ zu̱n ku ɓa.

³ Tun kor ndu̱ nduki nu̱ke a nje khiiran zhaaru̱m, ba wa tun khiiran su̱yen ndu̱ wora. Tun kor ndu̱ nduki nu̱ke a za bonye ba wa no za tun kya za bonyang.

⁴ Tun vu̱r zhaaji ye ɓu̱rti tun kap ɓaanu. Tun vu̱r zhaaji ye gaanggir ɓu̱rti ɓaanu ku̱me Magham ka kuma nu̱ zawar mbu̱ khu̱rti ndu̱ nu̱ shiran mbu̱ ɓu̱rti.

⁵ Shakh ma ɗyinonu ndu̱ ndolar mu̱zhin, tun gu̱n memu̱nanu ndu̱ ɗyi nu̱ke a kha nu. Wonji Magham wa zu̱ za, “Sar da ngam ɓu̱ njigto nu ɓa, alambu̱ram, ngam ɓu̱ yaɓti nu gha ɓa.”

⁶ Nang ke ɗyi nu̱ saki chem ka ɗu̱ma zu̱ran shwat nyem za, “Zhinkir gwaanji ke nu̱ shaata nga, ngam ɓu̱ tu̱k sawa ɓa. Nduk ka shi nu̱m ya?”

⁷ Kor ma dlegumeku ɓaanu nu̱ zu̱ki ɓalar ɓu̱ Magham ye nu. Nggu̱t ma pooni khar viti nu̱ shiki ku, ndu̱ lauɗar su̱ khar viti ɓaanda, tun da ɗyin saari maito ɓaanda.

⁸ Yesu Masiya nu̱ka nggoɗ ɓa, a nje ba wa nu̱ke a nje mbu̱ɗa ndu̱ meeni, ndu̱ aakochi koɗokhsi ɓa.

⁹ Ku̱ njig nu tu̱ mewar shogarku sa tun gal gha ɓa. Wa shipa ku̱ memu̱narem kha shokhku̱rokh nu̱ ku̱nshe mu̱nkir ɓu̱ Magham, yang nu̱ ku̱nshe mbu me ghai zu̱mndi ɗye zu̱mndi tu̱khu̱l ku ɓa. Pooni nang boota su̱ ye nduki nu̱ zu̱mki ɓa.

¹⁰ Yang ɓaarem du̱ku̱l sadke a nje khaarem nu̱ke kuruku nu̱ tlu̱nar shekhɗekh ɓu̱ Magham ka khaki nu̱ mban mbu̱ larji nang nu̱ gwa zalale nji sadke nu̱ke a nje ɗyinan ɓa.

¹¹ Gorkir ɓu̱ kurukwang wa ka vi ndu̱ tom ɓu̱ ɗye nggarkwang nu̱ mbu̱ Kib Nu̱ Dukki shakhshakhi ma ku̱ zoɓa sadka ku̱me solarku, yang dlu ɓu̱ ɗye nggarkwang ka va nu̱ gha qu̱rse ghayi.

¹² Wanang tu̱k Yesu wa za bonye qu̱rse ghayi ma ku̱ gaɓ nu̱ nduki shakhshakh nu̱ ku̱nshe tom ɓaran.

¹³ Ku̱me nang vi mi ma yir she nda qu̱rsi ghayi, ndu̱ dar pooni wuti katar nu̱ daki.

¹⁴ Ku̱me ghai a nje larji nang nu̱ke za ɓu̱ shi woɗa ɓa ɓa, yang ɓaarem chem sakya yiterem ye ghai nu̱ke a ɓari.

¹⁵ Yang ki mi zoɓa sadke khamndi ye Magham nu̱ ku̱nshe Yesu. Tu̱ khamndi ɓaarem kha ma ye ɓalarku na viki ve me, nu̱ saidaki dlu̱manang.

¹⁶ Yang mona nu shir ɗyi mbarkandi ndu̱ shaatar nduki ɓa, ku̱me nang ke pooni sadke nu̱ke Magham a tu̱k mu̱ndan.

¹⁷ Tun mbu su̱qur dlegumeku ɓaanu, tun shi ɗyi nu̱ zu̱ki ye nu ku tu̱k, ku̱me wor kya nggu̱t khar viti ɓaanu wa nduki nu̱ke a ma shiga su̱ ɗyi nu̱ wor tlu̱naki. Tun mbu wor tu̱ tlu̱nar ɓaanda kha ndu̱ kasha, waare taɗar memu̱na, ku̱me taɗar memu̱narang ɓu̱ ɗa ɓa ndu̱ boote nggur ye nu ɓa.

Khuti Bara

¹⁸ Shi ma barar yerem. Chem wa maita nu̱ ɗyine nu̱ memu̱narem wut za chem wa shi zop ɓa. Chem a shim ku̱ shi mi ɗyi mbarkandi mbe tlu̱nar ɓaarem kap.

¹⁹ Nga khutonu tun shi barar ya ma ku̱ Magham sa tang gaɓ nu̱ she nu nu̱ shopti ɓa.

Lauɗarsi Ɓalarang

²⁰ Ku̱ Magham nu̱ qaandi memu̱na, nu̱ke nu̱ ku̱nshe tom alqawar nu̱ke koɗokh si ɓa jiiki ndu̱ Zhinerem gwaanji Yesu ɓar mbe mu̱ti. Chin ke nu̱ khutlo gwaanji ɓu̱ shapir ɓu̱ ndu̱ɓangkwang,

²¹ daasa nun gha ndu̱ aa nyi tun nu̱ke mbari ma ku̱ shi nu shimndi ɓaran. A tlu̱na ɗyi nu̱ ghaɗye ɓaran daki yenda mbe nu, nu̱ ku̱nshe Yesu Masiya; zhaaji wa kha ɓaran koɗokhsi ɓa. Amin.

²² Nyeezaku, Nga khutonu, tun shi kaɗanyi ndu̱ wuro nu nang shiki, ku̱me nang bu̱la ɓalar kirkandi ye nu ɓa ɗo.

²³ Nga shim ku̱ zu̱n nu nu̱ ɗyine wa ngga mu̱dlerem Timoti gha zhaaru̱m. Mbu̱ a ɓa ɗau, chem ka ɗa ɓa su̱yen ma na nga nu.

²⁴ Tun shi qaandi ye dlegumeku ɓaanu, ndu̱ nduki ɓu̱ Magham kap. Nyeezeremku nu̱ke a Italiya a qaandi ye nu ku.

²⁵ Ku̱ mu̱nkir ɓu̱ Magham kha gha su̱yen ndu̱ tun kap.