Yibraniyeku 12 - Mewar Alqawarang

Magham ɗya Zhinerem

¹ Ku̱me nang, nu̱ke tabar ɓu̱ nu̱ saiduku khang maɗyi a nje kararan ndu̱ chem, bu ku̱ mbuk mi kap ɗyi nu̱ke ka nggu̱tlki rem ɗar gha, ndu̱ aa nyi solar nu̱ takhshaki rem nu̱ gha. Chem shi ɗar nu̱ke a gume rem nang ndu̱ shokhku̱rokh me bu̱n.

² Ghar mi yiterem nu̱ she Yesu nu̱ke chin ke dlu̱dlarsi maito ɓaarem, chin ka saki tu̱ maito ɓaarem kha nyeedlan. Chin nu̱ke ku̱me ɓong memu̱nar nu̱ saki nu̱ gume nda, tu̱ gu̱n memu̱naran ndu̱ kaatli nu̱ katlki nda gha ɗyine qu̱far kaatlang nu̱ da nang ma ɗye kawa ɓa. Yang leendang a nje kharan ɗyin bu̱n zu̱ma ɓu̱ zhakhɗye kwaaɗar ɓu̱ Magham.

³ Nggu̱t ma njif nu̱ shiki kanaɗyi ndu̱ zhangndi nu̱ ni solarku shiki yenda nang, ma ku̱ nggum nu tun fet memu̱na nu ɓar ɓa.

Wuuri ɓu̱ Zhinkir gwaanji Boota si

⁴ Mbu̱ wute nu̱ke tun a ɗyinan ndu̱ sola, nun khu̱l ye maa nu̱ke tom ɓaanu ka mbu̱ɗki dong ɓa.

⁵ Woɗye tun wa mona ɓalar par du̱mbu̱r nu̱ Magham shiki, nu̱ zu̱ki za tun qusonggi ɓaranang mu? Wa zu̱ za, “Yi ɓanga, gaɓ na ndu̱ wuuri ɓu̱ Zhinkir gwaanji ma ɗyi bamndi ɓa, yang ku̱ fet na memu̱na ɓar mbu̱ a wuror ɓa.

⁶ Jiwa Zhinkir gwaanji ka wukya njif nu̱ke a ndolaran, ka wukya woi nu̱ dlu̱ki ye varan.”

⁷ Gu̱n ma memu̱na nu ndu̱ bonye nu̱ke tun a zaran, ku̱me a shikya boote ndu̱ bonyang ma ku̱ shoga nu tunu. Magham a da nu wa qusonggi ɓaran, jiwa nyi woi ke zhin nu̱ka wuuri nda ɓa kwa?

⁸ Mbu̱ke to wuran ɓa (aa nu̱ke aaki wa ka gwa wu) nang wa wut nu̱ ɗyine tun qusonggi nu̱ke zhinki su̱ ɓa ɗo, tun a khar qusonggi mbarkandi ɓa.

⁹ Ai, aa zhinerem ku nu̱ mbu̱ larji wa ka wurerem, chem vu̱r zhaaji ye wor tu̱k ku̱men. Yang alapa, chem ɓu̱ vu̱r ɗyinerem chem dlu̱ wuri ɓu̱ Zhinerem nu̱ mbu̱ jiimba chem kha ndu̱ nyifi ɓa goma?

¹⁰ Zhinerem ku wa ka wurerem me sarchi koɗomma ve njiv nu̱ naki ku wa duk mbaari, yang Magham ka wurerem ma boote ɓaarem, ma kha mi shakhshakh wa chin.

¹¹ Wuri nu̱ shiki yerem kap wa ka khaterem, nyem ka tu̱k mu̱ndan ye sarchi nang ɓa. Yang qu̱rsan wa ka nggoɗ nduku tu̱ kha ndu̱ dambi ndu̱ qaandi memu̱na mbu̱ nu̱ zhin wa shoga tun mban.

Wuuri ɗyine Zhangndi Mu̱nkir ɓu̱ Magham

¹² Ku̱me nang shaata ma du̱mbu̱r ye me bu̱nonu nu̱ shiki ndotlu̱tla, tun pa du̱mbu̱r ye me purmonu nu̱ nggumki.

¹³ Ku̱dma ma njiv mbarkandi ye saaronu ma ku̱ zu̱ɓtiku kwata zu̱ɓti ɓa, me ɓu̱ nang, ku̱ gwakya shaanar ku.

¹⁴ Shi ma ɗyi nu̱ke tun ka ɗu̱maki ma ku̱ kha nu mu̱n ndu̱ aaki, tun kha shakhshakh, ku̱me nduk a nje nu̱ke ka naki Magham waare khar shakhshakhndi ɓa.

¹⁵ Ku̱r ma vaanu ma ku̱ aaki mbu̱ɗ gwar mu̱nkir ɓu̱ Magham ɓa. Ku̱ aaki kha ndu̱ ɗyooti mbi nu̱ka ɓa ki ndu̱ su̱bu̱rti tu̱ka su̱bu̱r nduki khangang ɓa.

¹⁶ Ku̱r ma vaanu mbari ma ku̱ aaki kha ma nu̱ zawa ɓa, yang ku̱ kha nu ndu̱ song sawar Magham wa Yisuwa nu̱ masaki ɗye mbu̱ ge gomir ɓaran ɓara ma ɗye zu̱mndi piti da ɓa.

¹⁷ Yang tun wa zu̱n nu̱ ɗyine qu̱rse nang wa shim ku̱ gwa nji barkyang, tu̱ yang zhang gha yenda. Nu̱ gwa zalale ku̱ nggoɗ nji nu̱ gha ɓa, aa nu̱ke wa laɓ barke nang ndu̱ ɗyim ghoori.

¹⁸ Nun ɗa ɓa she dleng nu̱ke nduki ka ɗu̱maki su̱ɓaran ɓa, yang she ɓai nu̱ke a dlu̱r maɗyi, ndu̱ zhum maari nu̱ khaki ghu̱ru̱t ɓa, yang nu̱ ɗa ɓa she sar maa,

¹⁹ ndu̱ piiri domndi, ndu̱ su̱qur ɓala ɓa. Su̱ qur ɓalar nang saki tu̱ nduki nu̱ tu̱kki khuɗ za ku̱ zu̱m guma ndu̱ ɓalar ye wor ɓa.

²⁰ Shi khutiku nang ku̱me nu̱ ɗu̱ma gu̱n memu̱na wor ndu̱ ɓalar nu̱ zu̱ki ye wor za, “Aa ɗye ngga su̱ɓaki dlengang, ku̱ mbuk ku tu̱ tlagha nu̱ gha.”

²¹ Ɗyi nu̱ naki ku nang tu̱ kha ye wor ma ɗye sawa maɗyi, tu̱ Musa zu̱ za, “Vara a dlu̱rti ku̱me sawa.”

²² Yang tun a ɓakya she Dleng Sikhiyona, she Urshalima nu̱ke a mbu̱ viɗi ghai ɓu̱ Magham nu̱ nyifiri, ndu̱ tabar ɓu̱ nu̱ ru̱ktiku ɓu̱ Magham khang maɗyi a kashar ku.

²³ Tun a ɓakya she tabar ɓu̱ nu̱ mbu Yesu ku, gomirku ɓaran, nu̱ bu̱laki dlu̱m wor nu̱ mbu̱ viɗi. Tun a ɓakya she Magham nu̱ke chin nu̱ kumar aaki, ndu̱ jiimbi nduki nu̱ dambi nu̱ gaɓki ndu̱ wor tu̱ kha nyeedlan ku.

²⁴ Tun a ɓakya she Yesu nu̱ daasaki mewar alqawar chele ɓu̱ Magham ndu̱ nduki ɓaran, kom tu̱ batl tom nu̱ka shiki ɓalar mbarkandi tu̱ duk tom ɓu̱ Khabila.

²⁵ Ku̱r ma vaanu ɗo zhang nu njif nu̱ke a ɓalarang gha ɓa. Zu̱n man gha nu̱ ɗyine, mbu̱ nduki nu̱ zhangki nduki nu̱ wuki wor mbu̱ larji nang nu̱ lawa ku ɓa, chem ɗa! Chem ka lawa mbu̱ khar njif nu̱ke a wurerem mbu̱ viɗi kikimndana?

²⁶ Ye sarchi naandangang su̱qur Magham wa yakhta larji. Yang leendang wa shi alqawar za, “Ngga yakhta larji sar da tu̱k, yang larji ɗyenda ɓa, ngga yakhta maa viɗi tu̱k.”

²⁷ Ɓalar nu̱ zu̱ki za, “sar da tu̱k,” nang wa wut nu̱ ɗyine ka da ɗyi nu̱ yakhtakyang ɓara, nang ke, ka da ɗyiku nu̱ du̱ngki ɓara, ma ku̱ ɗyiku nu̱ke ɓu̱ shi yakhta ɓa kha gha.

²⁸ Yang nang ɗo, nu̱ke chem a ma viri nu̱ mbu̱ kwaaɗar nu̱ke ɓu̱ shi yakhta ɓa, ku̱ kuna mi, chem ghar ghai ye Magham wa nu̱ke a shimndan. Mbu̱ sawar ndu̱ vu̱rti gorkiri,

²⁹ ku̱me Maghamndi ɓaarem ɗya ɓai nu̱ka zu̱mki aa nu̱m.