Yibraniyeku 10 - Mewar Alqawarang

Yesu ke Sadke nu̱ Dukki Aanyikandi

¹ Bibitang ɗya jiimbi ɗyiku mbarkandi nu̱ke a ɓar gana, chin ke jenggu̱reng ɗyikwang ɓa. Nang ke ɗyi nu̱ saki maatar vu̱rti sadkyang nu̱ka shiki sonyi nu̱ sonyiri ɓu̱ sa wor tu̱ kha torop mbu̱ ghaari ghai ɓaanda ɓa.

² Mbu̱ tu̱ga zalala kha Bibitang, tu̱ga nu̱ ching vu̱rti sadkeku nang gha de? Ai tu̱ga nu̱ vu̱rtan ku ka kha shakhshakh ku guma da, memu̱na wor ɓu̱ kha damtaran ku̱me solarku ɓaanda ɓa.

³ Yang vu̱rti sadkekwang ɗya njiv kwaari ndu̱ sola, aa nyi sonyi.

⁴ Jiwa ɓu̱ shi ku̱ tom ɓu̱ getliku ndu̱ gunoku da solarku ɓar ɓa.

⁵ Ku̱me nang nu̱ Masiya viki nu̱ mbu̱ larji tu̱ zu̱ za, “No shim sadkeku ndu̱ vu̱rtiku ɓa, to daasakya manva ya.

⁶ Yang ɓu̱ sadkeku nu̱ka vaki nu̱ gha ndu̱ nu̱ka shiɓki solarku no ka tu̱k mu̱ndan zum ɓa.

⁷ Yang tang zu̱ nga za, ‘Wonji nga fan ba wa nu̱ bu̱laki nu̱ ɗyina mbu̱ bu̱lar Ɓalar ɓu̱ Magham, nga ɓa ma shi shimndi ɓaaro ai Magham.’ ”

⁸ Gumapaali tu̱ zu̱ za, “Sadkeku, ndu̱ vu̱rtiku, ndu̱ sadke nu̱ka vaki nu̱ gha, ndu̱ sadke nu̱ka daki solar ɓara ta shimndan ɓa, yang no ka tu̱k mu̱ndan ɓa.” (Aa nu̱ke Bibitang zu̱ki za ku̱ nduk mbu ɗyiku nu̱ zu̱ki ku nang).

⁹ Tu̱ gaɓ tu̱k tu̱ zu̱ za, “Wonji nga fan, nga ɓa ma shi shimndi ɓaaro.” Nang a wutan za, wa du̱ng ɗyiku nu̱ daasaki guma nu̱ konggol ma ku̱ ɗa ɓa ndu̱ nu̱ rapang.

¹⁰ Mbe shimndi ɓu̱ Magham wa gaɓ ndu̱ chem ma nduki ɓaran shakhshakhndi nu̱ ku̱nshe sadke nu̱ Yesu Masiya vu̱rki man varan sar kaada ye kharki.

¹¹ Aa nyi kuru wa ka ching gha aa nyi fu̱ɗa a tlu̱nar kuru ɓaran, yang pooni vu̱rti sadke nu̱ka shiki tu̱ gaɓ tu̱ nggu̱rang nu̱ka shiɓ sola ɓa.

¹² Yang Masiya vu̱rkya sadke kaada guma da ku̱me solarku, tu̱ khan ɗyin bu̱n zu̱ma ɓu̱ Magham.

¹³ Yang ma ji ye sarchi naandang a bukya ma ku̱ gaɓ ndu̱ nu̱ zhangndi ɓaranku ma ɗye khatli mbu̱ saaran.

¹⁴ Ku̱me sadke dandi nang, wa gaɓ ndu̱ nduki nu̱ wakaki wor nu̱gha tu̱ kha nyeedlan ku koɗokhsi ɓa.

¹⁵ Jiimbi shakhshakhndi wa saida nang yerem. Gumapaali wa zu̱ za,

¹⁶ “Wonji alqawar nu̱ke nga ma shiran ndu̱ wora, qu̱rse sarchi nang, nga Zhinkir gwaanji zu̱ki. Ngga sa bibitiku ɓang nu̱ mbu̱ memu̱na wora, ngga bu̱la wor nu̱ mbu̱ kwaari ɓaanda tu̱k.”

¹⁷ Tu̱ gaɓ tu̱ zu̱ tu̱k za, “Solarku ɓaanda ndu̱ zop ku ɓaanda ngam ɓu̱ kor wor tu̱k ɓa.”

¹⁸ Yang sarchi nu̱ yaapaki sola, gangndi sadka nje ku̱me sola tu̱k ɓa.

Songndi Bing ndu̱ Magham

¹⁹ Ku̱me nang, nyeezaku, ɗye maitar a nje khaarem du̱mbu̱rkandi ma ku̱ vi mi nu̱ mbu̱ Kib Nu̱ Dukki shakhshakh nu̱ ku̱nshe tom ɓu̱ Yesu.

²⁰ Chin qu̱nki mewar njiv yerem, njiv nu̱ nyifiri, nu̱ ku̱nshe kapar nang, chin ke man varan.

²¹ Kuru gwaanji a nje khaarem nu̱ke nduki ɓu̱ Magham kap a mbu̱ bu̱nan.

²² Ku̱me nang a song mi nu̱ bing ndu̱ Magham ndu̱ memu̱nar zhirekandi, ndu̱ maito nu̱ke memu̱na rem rap rap ɓa. A song mi ndu̱ memu̱nar nu̱ shiɓki nu̱ gha mbe sola tu̱ kha shakhshakh, kom ndu̱ man var nu̱ shiɓki nu̱ gha ndu̱ ɗyim shakhshakhndi nggarnggar.

²³ Bu ku̱ ching mi gha shanggu̱ɗang ɗyine sar memu̱nar ɓaarem, nu̱ke chem a saidaran, ku̱me njif nu̱ shiki alqawaran ɗya nu̱ zhire.

²⁴ Bu taata mi yen ma ku̱ pa mi du̱mbu̱r ye yen nu̱ ku̱nshe wuti ndolar ndu̱ tlu̱nar dambi.

²⁵ Ku̱ laada mi tabar ɓaarem ma ghaari ghai ye Magham, wa nu̱ ɓeenan ku su̱nki ndu̱ shiran ɓa. Me ɓu̱ nang ki mi pa du̱mbu̱r ye yen, chem shaata shir wanang nu̱ si ku̱me tun a naran nu̱ ɗyine Fu̱ɗar nang wa shi bing ɓari.

²⁶ Sadke nggur a nje nu̱ke ka shiɓki sola ɓar ɓa mbu̱ chem wa zu̱m guma ndu̱ shir solar kharki qu̱rse chem wa zu̱n zhiryang.

²⁷ Me ɓu̱ nang kumar a nje nu̱ke ɗya ɗye sawa su̱yen ndu̱ gu̱rgu̱r ɓai nu̱ke ka ɓa vaki nu̱ zhangndiku ɓu̱ Magham.

²⁸ Njif nu̱ke nu̱ mbu bibiti ɓu̱ Musa ɓa wa ka tlagha nda nu̱ gha, zhiyaye si ɓa, mbu̱ nduk rap ma yir kunung wa saida.

²⁹ Yang njif nu̱ ndu̱mki Yi ɓu̱ Magham ɗa, wa gaɓ ndu̱ tom alqawar nu̱ wakaki nda nu̱ gha nang tu̱ kha bam, tu̱ pu̱z Jiimbi shakhshakhndi nu̱ mu̱nki! Tun a taman za ka shikya nyi pooni kumar gu̱rgu̱rndi nu̱ shipaki njif nang na?

³⁰ Ku̱me chem wa zu̱n njif nu̱ zu̱ki za, “Nga ke nu̱ dli gaɗa, yang ngga dli gaɗe ni.” Tu̱ gaɓ tu̱ zu̱ za, “Zhinkir gwaanji ka kuma nduki ɓaran.”

³¹ Ɗya ɗye sawa ku̱ nduk nggu̱ɗ nu̱ mbu̱ khar Maghamndi nu̱ nyifi.

Nduki nu̱ gu̱nki Memu̱na wor ka gwa ɗye Ɓiiri

³² Kor ma nu̱ ɗyine ɗau fara sarchi nun naki yarang ɓu̱ Magham, tun wa gu̱n memu̱na nu maɗyi, tun a wute mbu̱ bonyeku.

³³ Fu̱ɗar nggur nduki a pu̱zo nu ye dalangi, a vu̱r bonye ye nu, yang ye sarchi ngguri tun wa ka gonta ɗyinonu ndu̱ nduki nu̱ke a za pooni bonyeku nang.

³⁴ Jiwa tun wa na zhiyaye ɓu̱ nduki nu̱ke a nje khiiran zhaaru̱m, tun wa kasha sarchi nu̱ lawaki ɗyin kha nu ɓara, ku̱me tun wa zu̱n nu̱ ɗyine gu̱nar nu̱ dukki mbaari a nje kha nu nu̱ke ɓu̱ shi woɗa ɓa.

³⁵ Ku̱me nang ku̱ njig nu khar ndu̱ shokhku̱rokh memu̱na ɓa, ku̱me ka ɗa ɓa ndu̱ ɗye ɓiiri gwaanji ye nu.

³⁶ Wa shipa tun gu̱n memu̱na nu, ku̱me shir wanang ka sa tun shi shimndi ɓu̱ Magham, qu̱rsan tun gwa ɗyi nu̱ shiki alqawaranang.

³⁷ Jiwa ɓu̱ shoɓ ɓa, “Nu̱ ɓar nang ka ɗa ɓa, ɓu̱ mab ɓa.

³⁸ Nu̱ dambu ɓanga, ka ɗana, nu̱ ku̱nshe maito. Yang njif nu̱ gaɓki nu̱ gana, ngam ɓu̱ tu̱k mu̱ndi ɓaran ɓa.”

³⁹ Yang ɓaarem chem a mbu̱ nduki nu̱ ka gaɓki nu̱ gana ma ku̱ su̱ya ɓa, ɓaarem chem a mbu̱ nduki nu̱ka maitaki tu̱ gwa ɗanari.