Yaqub 5 - Mewar Alqawarang

Wa Wu nu̱ Gu̱narku

¹ Tu̱k ma tun nu̱ gu̱narku! Shi ma ghoori tun ghwat zhaano ku̱me bonye nu̱ke a ɓar ɗyinonu.

² Gu̱nar ɓaanu kap ka mu̱tli, susutiku ka nji ɗye sarku ɓaanu ɓara.

³ Ginarwe ɓaanu ndu̱ ghuri ɓaanu wa na loghoz. Nar loghzi nu̱ shikyang ka khaki ma saidu ɗyine nu, yang ka zu̱mndo nu ɓar wa ɓai. Tun wa taba gu̱nar ye ɗyinonu mbu̱ qaandiku nang, yang ɗya lauɗar su̱ qaandi virkirku.

⁴ Jiwa ɗye ɓiiri ni nu̱ tlu̱narku ye nu mbu̱ dam ɓaanu, nun zhangki ɓi wor gha ku̱me batal ɓaanu, a ghoori ye Magham. Wanang tu̱k ghoori ɓu̱ nu̱ ku̱mndi ye nu ku mbu̱ dam ɓaanu wa khu̱l she Magham, Zhinkir gwaanji Nu̱ Zalale Aa nu̱m.

⁵ Tun wa shi khar ɓaanu mbu̱ larji nang mbu̱ tu̱kti mu̱ndi, tun a zu̱mndi ndu̱ zari mbu̱ yele. Nu̱ke wanangang tun khutlokya ɗyinonu ma bu fu̱ɗar dlar qura nu.

⁶ Tun wa kuma nduki mbarkandi, tun tlagha wora, aa nu̱ke nu̱ zhangndo nu ku ɓa.

Kanaɗyi ndu̱ Barari

⁷ Ku̱me nang, nyeezaku, shi ma khar kanaɗyi ma ɓar ye sarchi nu̱ke Zhinkir gwaanji ka ɗa gaɓki. Nggu̱t ma pooni kaɗanyi nu̱ke nu̱ ghuti ka shiki sarchi nu̱ke a bu dam ɓaran ku̱ vu̱r boote mbarkandi. Wa ka shi kaɗanyi tu̱ bu romndi nu̱ gumapaali ndu̱ nu̱ gana.

⁸ Tun kha ndu̱ kanaɗyi tu̱k. Tun ching gha shanggu̱ɗang, ku̱me ɓar ɓu̱ Zhinkir gwaanji wa shi bing.

⁹ Nyeezaku, njig ma ruru chele ɓaanu, ma ku̱ kuma nu ɓa. Wonji nu̱ kumarang a shi bing ɓari, a nje me viri.

¹⁰ Nyeezaku, shoga ma she annabiku nu̱ shiki ɓalar mbu̱ dlu̱m Zhinkir gwaanji. Tun shoga pooni gu̱ndi memu̱nar ɓaanda mbe bonye.

¹¹ Jiwa chem wa da nduki nu̱ gu̱ndi memu̱na ma nu̱ barkeku. Tun wa tu̱k pooni kanaɗyi ɓu̱ Ayuba, tun wa zu̱n barke nu̱ Zhinkir gwaanji shiki yenda ve lauɗar san tu̱k. Ku̱me Zhinkir gwaanji ɗya nu̱ khang mu̱nki nu̱ nar zhiyaye tu̱k.

¹² Guma ndu̱ aa nu̱m kap, nyeezaku, mbu̱ tun a ma da alqawar shir tunu, sar da ku̱mnda nu ɓa. Ku̱mnda nu ndu̱ maa viɗi ɓa yang ndu̱ maa vu̱ghai ɓa, yang tu̱k ku̱mnda nu ndu̱ aa nu̱m zum ɓa. Tun ka zu̱ nun za, “I” ndu̱ “Auwo” ɗyenda, ku̱me ku̱ vi nun mbu̱ kumar ɓu̱ Magham ɓa.

¹³ Nduk a nje chele ɓaanu nu̱ke a mbu̱ bonye mu? Mbu̱ a nje ku̱ shi barari. Nduk a nje nu̱ke a kashar mu? Mbu̱ a nje ku̱ qa nji taazi makhtari.

¹⁴ Nduk a nje nu̱ke nu̱ da lawan ɓa mu? Ku̱ qa nduk kudaandi tu̱ shi barar yenda, a zu̱ mor nu̱ ve nda mbu̱ dlu̱m Zhinerem gwaanji.

¹⁵ Barar nu̱ shiki ndu̱ maito ka shaana nu̱ khaatang. Zhinkir gwaanji ka shaana nda nu̱ gha. Mbu̱ wa shi sola, Magham ka yaapa nda.

¹⁶ Ku̱me nang zu̱ma zop ɓaanu ye yen, tun ki barar ye yen, ma ku̱ shaana nu. Barar ɓu̱ nu̱ dambu wa ka shi tlu̱nar ndu̱ zalale maɗyi.

¹⁷ Iliya ɗya ba nduk wa chem. Tu̱ yang ching gha shaanggu̱ɗang mbe barar maɗyi ma ku̱ shi roma ɓa, yang yel nu̱ shi romndi mbu̱ maarang ɓa me sonyi kunung ndu̱ chere njong.

¹⁸ Qu̱rsan tu̱ shi barar tu̱k, tu̱ romndi a ɓa viɗi, tu̱ maa vu̱ghai vu̱r boote ɓaran.

¹⁹ Nyeezaku, mbu̱ da chele ɓaanu wa njig njiv zhire, tu̱ yang njif nggur chele ɓaanu a gaɓ ndu̱ chin ve njiva.

²⁰ Ku̱ zu̱n nu̱ gha, njif nu̱ ɗa gaɓki ndu̱ nu̱ sola ve njiva wa ɗana nyifi ɓu̱ nu̱ solarang ɓar mbe mu̱ti, ka kha ma njiv yaapar solarku khang maɗyi.