Yaqub 4 - Mewar Alqawarang

Ba nu Raptikir ndu̱ Larji ɓa

¹ Nu̱m ke nu̱ ɓar ndu̱ keele ndu̱ dakhlari chele ɓanwang na? A ɓa ku̱me melakhku zum zumndi nu̱ke a dakhlar mbu̱ vaanu ɓa goma?

² Tun wa ka laɓ tunu tun mbu̱ɗ ɗyen, ku̱me nang tun shi tlaghar mu̱ti. Tun shi zhiri ɗyin kha nduki, tun ku̱na gwaran, tun vi ma keele ndu̱ dakhlari. Nun ka gwa ɗyi nu̱ke tun a labtanang ɓa ku̱me nun ka shi bara ɓa.

³ Yang aa tun wa shi bararang nun ka gwa ɓa ku̱me tun ku̱rkya ɗyi malkandi. Tun a shim sagha ɗyi nu̱ke tun ka gwakyang ye maa tlu̱nar bamndiku ma laɓ tu̱kti mu̱ndi ye vaanu.

⁴ Tun nu̱ song shir zhire! Alapa nun zu̱n nu̱ ɗyine bar raptikir ndu̱ larji ɗya kare ndu̱ Magham ɓa goma? Ku̱me aaki ndolaki larji, a gaɓkya ndu̱ ɗyinan ma nu̱ kare ndu̱ Magham.

⁵ Tamandi ɓaanu bu̱lar Ɓalar ɓu̱ Magham shi ɓalarang bam mu nu̱ zu̱ki za, “Magham nyeedlan ndu̱ zhiri maɗyikandi ku̱me a ndola rem ku̱me jiimbi nu̱ saki nu̱ mbe remang” ɓa goma?

⁶ Yang Magham a nje a shaata mu̱nkir khangndi yerem, nang ke ɗyi nu̱ saki tu̱ bu̱lar Ɓalar ɓu̱ Magham zu̱ za, “Magham wa zhang nu̱ gwaari ɗyin, yang wa ka shi mu̱nkir ye nu̱ ɓu̱tokh memu̱na.”

⁷ Ku̱me nang tun vu̱r ɗyinonu guma da ye Magham. Zhang ma Sheɗan, ka ɗa varan.

⁸ Kha ma bing ndu̱ Magham, Magham ka shi bing ndu̱ tunu. Tun nu̱ solar ku, tun kwaɗa ɗye shir ɓaanu tun kha wakaran. Tun nu̱ke memu̱nanu rap rap yang, shiɓ ma memu̱na nun gha

⁹ Ku̱ mbonu su̱bu̱ri, shi ma ghoori, tun zhur ɗyim gho. Bu ku̱ mu̱si ɓaanu gaɓ ma gho, tu̱ ɓong memu̱nar ɓaanu gaɓ ma chiti mbu.

¹⁰ Wut ma katar ɗyin ɓaanu gume Zhinkir gwaanji, chin ka vu̱rki gorkir ye nu.

Du̱ng na Zop ye Mu̱dlo ɓa

¹¹ Nyeezaku, njig ma pu̱zi yen. Ku̱me aaki pu̱zki mu̱dlen nu̱ mbu Yesu, bai tu̱ du̱ng zop nggur nu̱ ɗyine nda gom, a pu̱zkya Bibiti ɓu̱ Magham, a du̱ngkya zop ye Bibiti ɓu̱ Magham tu̱k. Mbu̱ yang ta pu̱z Bibiti ɓu̱ Magham ta kha ma nu̱ zhangndi mburan gha. Kom ta gaɓ ndu̱ ɗyino ma nu̱ du̱ngndi zop ye bibitang tu̱k.

¹² Magham ɗyenda ke nu̱ vu̱rti bibiti. I! Chin ke nu kumar tu̱k. Chin ɗyenda ke nu̱ vu̱r ɗanari, chin ke nu̱ zalale tlaghar nduku. Ku̱me nang, to kiya nu̱ke to ka du̱ngki zop ye njif nggurang na?

Shi na Wakhti nu̱ ɗyine ɗyin Wur ɓa

¹³ Tu̱k ma, tun nun ka zu̱ki za, “Chem a yir mbu̱ ghai ka meeni ndu̱ wuri, chem ka ɗa shi sonyi da ɗyin gomari chem a gwa tun ɗyinan.”

¹⁴ Yang wonji nun zu̱n ɗyi nu̱ke ka ɗatlki wur ɓa. Woɗye, nu̱m ke nyifi ɓaanwang? Ai, a khar wa pupondo nu̱ka ɓa ki me sarchi koɗomma tu̱ ɓa lakhta ɓara.

¹⁵ Shipa tu̱ga tun ka zu̱ nun za, “Mbu̱ Magham wa tlogha san yerem, chem a mbu̱ nu̱ nyifiri ku tu̱k, chem ka shi ɗyi nang ka chem shi ɗyi nang ka.”

¹⁶ Yang wonji leendang tun a gwaari ɗyin, tun a wakhti. Ai, pooni gwaari ɗyin nang mbar ɓa.

¹⁷ Ku̱me nang aaki zu̱nki ɗyi nu̱ shipaki ku̱ shi tu̱ yang zhang shiran gha, wa kha ma sola she nda.