Yaqub 3 - Mewar Alqawarang

Rosar Ghin

¹ Nyeezaku, ku̱ nduki khang chele ɓaanu shim khar ma maalu̱mku ɓa, ku̱me tun wa zu̱n nu̱ ɗyine chem nyem ka shogaki ɓalar ɓu̱ Magham ɓara, ka kuma rem gu̱rgu̱r tu̱ duk ɓu̱ ɓeeni nduki.

² Ku̱me kap ɓaarem chem wa ka shi zop ve njivku zum zum. Mbu̱ yang nduk nu̱ ka shi zop mbe ɓalar ɓaran ɓa, njif nang ɗya njif nu̱ke nyeedlan, wa ka ɗu̱ma ku̱s varan guma da.

³ Chem wa ka sa lu̱mzhamndi nu̱ mbu̱ me pu̱rsi ma ku̱ shi shimndi ɓaarem. Shir wanangang ka sa chem dambu̱rti nda nu̱ ye maa nu̱ke chem a shimndan.

⁴ Nggu̱t ma du̱mbu̱l ɗyim ku tun na ɓa. Aa nu̱ke ɗya ɗyi gwaanji ku, khu̱kheeti du̱mbu̱rkandi ke nu̱ tu̱pa wora, yang kap ndu̱ nang nu̱ chi du̱mbu̱lang ka shikya boote ndu̱ ɗye chi du̱mbu̱l koɗommandi. Tu̱ mbu̱m du̱mbu̱lang ma yir ye maa nyin shimki.

⁵ Ghiindi nduk ba wanang tu̱k. Aa nu̱ke ɗya ɗyi koɗommandi mbu̱ me bar ɓu̱ nduku, yang kap ndu̱ nang nyeedlan ndu̱ ɗyi gwaanji gwaanji ku nu̱ke a shimndan. Nggu̱t ɗyi nu̱ke ɓai koɗommandi ka shiki ye maa gar ɓa, ka va ɓar kap.

⁶ Ai, ghiindi nduk ɗya ɓai, nyeedlan ndu̱ tlu̱nar malkandi mbu̱ man vaarem! Ka su̱bu̱r nduk nu̱gha guma da. Ghin ka su̱bu̱r nduk ve njiv khar viti ɓaran kap. Yang giɗim ɓai ke nu̱ shiɓti nda.

⁷ Nduk ka ɗu̱ma za ɗyin dlu gaariku ndu̱ ɗyikhtiku, ndu̱ su̱tiku ndu̱ kashangku ndu̱ ɗyin mbu̱ ɗyimku ndu̱ yurviku kap, nduk wa woɗa za ɗyin wora.

⁸ Yang nduk a nje nu̱ ke ka rosaki ghiindan ɓa. Ghin ɗya ɗyi malkandi nu̱ke nu̱ka shi mas ɓa, nyeedlan ndu̱ chiti nu̱ka tlaghaki nduku.

⁹ Chem ka kham Zhinkir gwaanji Zhinerem si, yang chem ka pu̱z nduki nu̱ Magham shiki wor mbu̱ shipar ɓaran si tu̱k.

¹⁰ Chem ka shi khamndang ndu̱ me rem dandi nang, chem gaɓ chem shi pu̱zi su̱ tu̱k. Wush, nyeezaku! Ai, nu̱ shipa ku̱ ɗyen kha wanang ɓa.

¹¹ Woɗye ge ɗyim da ka ɗa ɓagha ɗyim mu̱nkandi ndu̱ ɗyotndi ye maa da mu?

¹² Nyeezaku, woɗye qu̱far suga ka kha ye zaitun mu, yang qu̱far daanggi ɓu̱ kha ye nggoɗuma zum ɓa? Wanang tu̱k ge ɗyim nu̱ke khenkhen ɓu̱ ɓagha ɗyim mu̱nkandi ɓa.

Kaɗari ndu̱ Zhire

¹³ Yang ki chele ɓaanu ke nu̱ kaɗari ndu̱ dar mbu̱ tuna? Ku̱ nu̱ zhin wut ku̱nshe khar viti mbarkandi, ndu̱ tlu̱nar mbarkandi nyin ka shiki mbu̱ ɓu̱tokh memu̱nar nu̱ nduk ka gwaki mbe kaɗari.

¹⁴ Mbu̱ yang zhiri malkandi ndu̱ ndolar ɗyin a nje mbu̱ memu̱na nu, njig ma wuti ɗyinonu, yang lu̱panu zhire ni nu̱gha ɓa.

¹⁵ Pooni kaɗari nang ɗya kaɗari nu̱ka ɓa ki viɗ ɓa, ɗya nu̱ larji. Ɗya nu̱ jiimba ɓa, ɗya ɓu̱ Sheɗan.

¹⁶ Jiwa maa nu̱ke zhiri ndu̱ ndolar ɗyin a nje kap, ghi maari ndu̱ aa nyi pooni mu̱na a nje ye maaran tu̱k.

¹⁷ Yang pooni kaɗari nu̱ke Magham ka vu̱rkyang, ɗya kaɗari nu̱ke shakhshakh gumapaali. Ka ɗa ɓa ndu̱ qaandi memu̱na, ndu̱ khar tu̱tu̱k, ndu̱ ɓu̱tokh ɗyini, ndu̱ khang nar zhiyaye, ndu̱ khang mu̱nkir tu̱k. Wa da aaki wayen, wa ka tlu̱na ɗyi mbarkandi.

¹⁸ Pooni nu̱ke nu̱ somtarku ka kaɓki mbu̱ qaandi memu̱na wa ka ɓa ndu̱ khar viti mbarkandi.